Picha kwa hisani –

Serikali imewahakikisha wazazi na wadau wengine kwamba mikakati ya maandalizi ya shule imeimarishwa zaidi na wanafunzi wanafaa kurudi shule kuanzia siku ya Jumatatu hapo kesho.

Katika kikao na Wanahabari kule jijini Nairobi, Waziri wa Elimu nchini Profesa George Magoha amesema mikakati yote iko sawa na wazazi hawafai kuhofia kuhusu usalama  wa   watoto  wao kwani virusi vya Corona vimedhibitiwa shuleni.

Waziri Magoha amesema tayari zaidi ya madawati  elfu tano yamekamilika na yatasambazwa shuleni huku akisema shilingi bilioni nne kufikia kesho zitakuwa zimesambazwa katika shule za msingi na bilioni 16 kwa shule za upili.

Kwa upande wake Waziri wa uchukuzi nchini James Macharia, amesema mazungumzo baina ya serikali na wadau wa sekta ya uchukuzi yamefanywa na kuafikia kwamba  madereva wote hawatahitaji kusafiri  kwa mwendo mrefu na watapimwa  kubaini iwapo wametumia vileo .

Hata hivyo mawaziri hao yameyasema  hayo baada ya kufanya mkutano na wadau wa maswala ya kielimu ikiwemo Tume ya TSC, Chama cha walimu nchini KNUT, chama cha wazazi nchini  pamoja  na  chama cha walimu wa shule za kibinafsi miongoni mwa wadau wengine.