Mahakama ya mjini Mombasa  imemhukumu mbunge wa Changamwe Omar Mwinyi kifungo cha miaka minne gerezani baada ya kupatikana na kosa la kuwajeruhi  maafisa wa polisi.

Hakimu Mkuu Evans Makori  ametoa uamuzi huo akisema kuwa  ushahidi uliotolewa mahakamani umedhihirisha wazi kuwa  Mwinyi na wafuasi wake waliwajeruhi Dennis Nambisia na Agapio Ndwiga wakati wa kura za utezi wa chama cha ODM mwaka uliopita.

Hakimu huyo ameeleza kuwa  ripoti ya matibabu imeonyesha kuwa  maafisa hao wa polisi walijeruhiwa vibaya kufuatia uvamizi huo.

Kabla ya kutoa uamuzi huo, vikao vya mahakama  vimehairishwa kwa mda ili kutoa nafasi kwa  mbunge huyo kujiandaa kutoa malilio yake baada ya upande wa mashtaka kuomba mda zaidi ili kutoa ombi kulingana na sheria.

Maafisa hao wa polisi walikuwa  wakitoa ulinzi kwa wapiga kura na  maafisa wa tume huru ya uchaguzi  na mipaka IEBC wakati wa tukio hilo.