Afisa  wa idara ya huduma za jamii eneo la lungalunga Enock Masita amefikishwa katika mahakama ya Kwale baada ya kukamatwa siku ya Jumatano kwa madai ya kumnajisi msichana mwenye umri wa miaka 17, mwanafunzi wa kidato cha pili katika shule  ya upili ya wasichana ya Mwangeka kaunti ya  Taita Taveta.

Akithibitisha kisa hicho afisa mkuu wa polisi eneo la Matuga Joel Chesire amesema kuwa Masita anadaiwa kutekeleza unyama huo  siku ya Jumamosi katika nyumba moja ya malazi ya wageni mjini Kwale.

Chesire  amesema kwamba msichana aliyenajisiwa ni yatima katika nyumba  ya  Watoto  ya  upendo  huko  Matuga  ambapo afisa huyo wa huduma za jamii huwatembelea na kuwapa misaada kutoka kwa serikali .

Chesire amekilaani kisa hicho akiwaonya maafisa wengine wa serikali wanaoendeleza dhulma kwa jamii kuwa wataadhibiwa vikali.

Kwa upande wake mtetezi wa haki za kibinadamu wa shirika la Haki Afrika tawi la Kwale Alexander Mbela  ametaka mshtakiwa kuadhibiwa vikali ili haki ipatikane kwa mwathiriwa.

Haya yanajiri  siku chache tu baada ya mbunge wa Matuga Kassim Sawa Tandaza  kutaka wanaume wanaotekeleza visa vya unajisi kuhasiwa.