Naibu gavana wa kaunti  ya Kwale Bi Fatuma Achani, amemsuta  Mbunge wa Kinango Benjamin Dalu Tayari, baada ya  mbunge huyo kuibua madai kwamba  amefuja  shilingi bilioni 2 zilizotengewa mradi wa bwawa  la Mwache.

Akiongea  mjini Kinango Achani amesema  kuwa maisha yake yako hatarini kufuatia matamshi ya  chuki  na uchochezi yaliyotolewa na  mbunge huyo wa Kinango akisema kuwa ameandikisha taarifa katika kituo cha polisi cha Kinango kuhusiana na suala hilo.

Ameyataja matamshi  hayo  kama  propaganda, akisema kwamba  ni njama ya kumharibia jina  na azma yake ya kuwania kiti cha ugavana mwaka wa 2022.

Bi Achani amesisitiza kwamba siasa za uchochezi hazitayumbisha juhudi zake za kuwahudumia wakaazi wa Kwale, akisema ana haki ya kuzuru kila sehemu ya kaunti ya Kwale.

Mbunge wa Kinango Benjamin Dalu Tayari amedai kwamba Naibu gavana Fatuma Achani alifuja shilingi billion mbili zilizotengewa mradi wa bwawa la Mwache na kupeleka pesa hizo katika gatuzi dogo la Matuga na Msambweni.

Taarifa na Michael Otieno.