Monthly Archives: February 2023

Story by: Gabriel Mwaganjoni

Maafisa wa polisi kaunti ya Mombasa wamemtia nguvuni jamaa mmoja aliyesababisha ajali ya barabarani iliyosababisha kifo cha Polisi wa trafiki alipokuwa kazini katika daraja la Nyali kwenye barabara kuu ya Mombasa–Malindi.

Polisi wamesema marehemu Julius Marwa akiwa kazini alisimamisha gari moja ili kulikagua hatua iliyomkera dereva wa gari hilo Osman Jama Abdi na kusababisha polisi huyo kuufungua mlango wa gari hilo ili kulizima ndipo Abdi alipoliondoa gari hilo kwa kasi huku polisi huyo akining’inia kabla ya kuanguka na kuganyagwa na gari hilo.

Afisa mkuu wa polisi wa kituo cha Urban Maxwell Agoro amesema Marwa aliyekuwa akihudumu katika kituo cha polisi cha Makupa ameuaga dunia baada ya kukimbizwa katika hospitali ya Joacham eneo la Kengeleni.

Kwa sasa Abdi anazuiliwa katika kituo cha polisi cha Makupa huku gari lake likizuiliwa kituoni humo akisuburi kufikishwa mahakamani punde tu uchunguzi utakapokamilika.

Story by: Gabriel Mwaganjoni

Jumla ya familia 5 katika eneo la Bondora gatuzi dogo la Rabai kaunti ya Kilifi zimenufaika na ufadhili wa kimasomo kwa watoto wao waliomaliza darasa la nane mwaka wa 2022.

Licha ya watoto hao kupata alama 350 na zaidi katika mtihani wa kitaifa wa KCPE mwaka wa 2022, walikuwa bado hawajajiunga na kidato cha kwanza kutokana na ukosefu wa karo.

Mmoja wa wazazi wa watoto hao Gladys Dama ameeleza mahangaiko aliyoyapitia kabla ya kampuni ya Simba Cement kujitolea na kuwalipia karo watoto hao. 

Wakati uo huo, Msimamizi wa kampuni ya Devki Peter Paul ambaye ni mmiliki wa kiwanda hicho cha kutengeneza simiti cha Simba amesema mbali na ufadhili wa karo kampuni hiyo itawekeza katika kuwapatia chakula cha msaada wakaazi wanaoishi katika mazingira duni.

Story by: Gabriel Mwaganjoni

Waumini wa Kanisa katoliki kote ulimwenguni wamemiminika makanisa kuadhimisha ibada ya Misa ya Jumatano ya majivu.

Ibada hiyo inaashiria kuanza rasmi kwa kipindi cha Kwaresma ambapo Waumini hao hufunga kula na kunywa na kuzidisha ibada sawa na kutubia dhambi zao kwa kipindi cha siku 40 kabla ya maadhimisho ya Sikukuu ya Pasaka.

Askofu mkuu wa Kanisa katoliki jimbo kuu la Mombasa Martin Kivuva ameongoza ibada hiyo ya Misa katika kanisa katoliki la Holy Ghost Cathedral mjini Mombasa na amewapaka majivu waumini kwenye paji la uso.

Aidha amewasihi wakristu kuzidisha ibada zao, kufunga na kuomba na kujiweka karibu na wasiojiweza katika jamii sawa na kuliombea taifa ili wakenya wajitenge na malumbano na migawanyiko ya kisiasa.

Askofu Kivuvu ambaye pia ni Mwenyekiti wa kitaifa wa Baraza la Maaskofu wa Kanisa Katoliki nchini amezidi kuwashambulia wanasiasa, akisema wamelirudisha taifa hili katika joto la kisiasa na mabishano ambayo ni dhahiri wazi kwamba yamewaganya wakenya katika misingi ya vyama vya kisiasa.

Hata hivyo Ibada sawa na hiyo imefanyika katika kanisa la kianglikana vile vile wito ukitolewa kwa waumini wa Kanisa hilo kuzidisha ibada, kutubia dhambi zao na kuliombea taifa wakati huu wa mfungo.

Story by: Gabriel Mwaganjoni:

Japo kumekuwa na changamoto hasa ya kupata maji ya kuikuza miti katika juhudi za upanzi wa miche mashinani wakaazi wa Pwani hawafai kujitenga na mradi huo bali kushiriki kikamilifu

Seneta maalum Miraj Abdillahi amesema endapo wakaazi watajitenga na mchakato huo basi taifa hili litazidi kuathirika na makali ya ukame hali itakayoathiri zaidi maisha ya wananchi katika miaka ijayo.

Akizungumza katika kaunti ya Mombasa, Miraj amesema wananchi wanastahili kushiriki upanzi wa miti katika sehemu zao za makaazi na kisha baadaye kushirikiana na wadau wa kimazingira katika kuendeleza mradi huo katika maeneo mengine ya Ukanda wa Pwani.

Katika mradi huo uliyoanzishwa na Rais William Ruto wa upanzi wa miti bilioni 15 katika kipindi cha miaka 10 ijayo, Miraj ananuia kupanda miti milioni 2 katika ukanda wa Pwani.

Story by: Gabriel Mwaganjoni

Viongozi wa kisiasa na wale wa kijamii katika Wadi ya Kipevu eneo bunge Changamwe wamezindua hamasa kwa jamii kuhusu umuhimu wa kudumisha usafi wa mazingira katika maeneo wanayoishi.

Mwakilishi wa Wadi ya Kipevu Leila Nyanche amesema ni sharti wakaazi wafahamishwe kuhusu athari za uchafuzi wa mazingira na kutupa taka ovyo mitaani, ili wasilalamike pindi wanapotiwa nguvuni na kuadhibiwa kisheria.

Ni kauli iliyoungwa mkono na Afisa wa idara ya mazingira katika kaunti ya Mombasa Dan Makokha aliyesisitiza kwamba lengo kuu la vikao hivyo ni kuwafahamisha wakaazi kuhusu jukumu la kuyatunza mazingira.

Kwa upande wao wakaazi wa eneo hilo la Kipevu wameapa kutofufua majaa ya taka yaliofungwa rasmi na Serikali ya kaunti ya Mombasa na badala yake kushirikiana katika kudhibiti mirundiko ya taka katika maeneo ya makaazi.

Story by: Mimuh Mohamed

Ubalozi wa Marekani jijini Nairobi umetoa tahadhari ya kutokea kwa shambulizi la kigaidi humu nchini na kuwataka raia wa Marekani kuwa waangalifu wanapokuwa katika maeneo ambayo raia wa kigeni huzuru kwa wingi.

Katika tahadhari hiyo iliyotolewa ubalozi huo wa Marekani humu nchini umesema jiji la Nairobi bado ni eneo linalolengwa zaidi na magaidi ambao wanapanga kutekeleza mashambulizi.

Ubalozi huo wa Marekani umewataka wakenya pamoja na raia wa Marekani kuwa waangalifu na mazingira yao huku ukipongeza serikali ya Kenya kwa kuongeza juhudi za kukabiliana na mitandao ya kigaidi.

Notisi hiyo imebainisha kwamba makundi ya kigaidi yanaweza kufanya mashambulizi pasi na kutoa ilani, yakilenga hoteli, majengo ya ubalozi, mikahawa, shule, vituo vya polisi, nyumba za ibada na maeneo ambayo watalii huzuru mara kwa mara.