Monthly Archives: January 2023

Story by: Mwahoka Mtsumi

Rais William Ruto amefungua rasmi Kongamano la viongozi wa mashtaka ya umma linalolenga kuboresha utendakazi bora na ushirikiano wa Afrika ili kufanikisha usawa na haki Mahakamani.

Akizungumza wakati wa ufunguzi wa Kongamano hilo la 16 linalojumuisha mataifa 43, Rais Ruto amesema viongozi wa mashtaka wa jukumu la kuhakikisha bara la afrika linapiga hatua katika ufanikishaji wa katiba, siasa na uongozi bora.

Kiongozi wa taifa amesema mikakati bora iliyowekwa utawezesha viongozi hao kukabiliana na ufisadi, dhulma za jinsia, ugaidi maswala mengine tata barani afrika ili kuhakikisha mfumo wa haki za jinai unaangaziwa.

Kwa upande wake Mkurugenzi wa mshataka ya umma humu nchini Noordin Hajj ameweka wazi kwamba kupitia mikataba bora iliyowekwa itachangia bara za afrika kuzingatia muongozo wa Katiba na sheria katika kushughulikia kesi Mahakamani.

Naye mkurugenzi wa mashtaka ya umma kutoka taifa la Nigeria Babadogo Mohamed amesema ugaidi na itikadi kali ni changamoto katika bara la afrika na kushinikiza idara husika sawa na viongozi wa mashtaka kushirikiana kimawazo na kulikabili tatizo hilo.

Wakati uo huo Mkurugenzi wa mashtaka ya umma kutoka taifa la Afrika Kusini Wakili Shamila Patoi amewahimiza viongozi wa mashtaka ya umma kuzingatia sheria katika utekandazi wao sawa na kujitenga na ushawishi wa kisiasa.

Story by: Gabriel Mwaganjoni

Kutokana na lalama za ubaguzi katika utoaji wa ufadhili wa masomo katika eneo bunge la Jomvu kaunti ya Mombasa, Mbunge wa eneo hilo Badi Twalib ameliboresha zoezi hilo na kulifanya katika sehemu zilizo wazi kwa wazazi kufika na kukaguliwa stakabadhi za watoto wao.

Kulingana na Badi, ni sharti watoto wanaohitaji wanufaike na msaada huo wa kimasomo na wala sio wale walio na uwezo wa kuwalipia karo watoto wao.

Akizungumza katika eneo bunge lake la Jomvu, Badi amesema ukaguzi wa stakabadhi hizo unafanyika kwa njia ya uwazi huku akiwasihi wazazi watakaohisi kubaguliwa au kuonewa katika njia yoyote ile kuwasilisha lalama hizo kwake.

Kongozi huyo amesema ameboresha mpango huo wa ugavi wa basari ili kuwafadhili wanafunzi kutoka familia maskini kwa karo ya mwaka mzima shuleni

Story by: Mercy Tumaini

Chama cha Wazee wa Kaya za Mijikenda kanda ya Pwani kimewataka viongozi waliochaguliwa kuwaheshimu wazee wa Kaya na wala sio kuwatumia wazee hao kama mbinu ya kujinufaisha binafsi.

Msemaji wa Chama hicho Naomi Cidi Kumbatha amesema Wazee wa Kaya wamekuwa wakidharauliwa na viongozi wa kisiasa na kuwatumia wakati wanapotafuta nyadhfa za kisiasa.

Akihutubia Wanahabari katika msitu wa Kayafungo, Naomi amesema wazee hao watawasilisha mapendekezo yao wenyewe mbele ya Rais kwani viongozi wa kisiasa wamekuwa wakiwalaghai kwa miaka mingi.

Kwa upande wake  Mwenyekiti wa  chama hicho cha wazee wa Kaya za Mijikenda Mwinyi  Mwalimu Murisho amesema changamoto  wanazopitia  wazee hao ni ukosefu wa hati miliki na kutotambuliwa na serekali.

Story by: Mwahoka Mtsumi

Mkurugenzi mkuu wa Shirika la kutetea haki za kibinadamu la Haki Africa Hussein Khalid amesema japo taifa linashuhudia utovu wa usalama unaochangiwa na wahalifu ni lazima sheria izingatiwe.

Khalid amesema sheria zilizobuniwa nchini ni lazima zizingatiwa ndipo visa vya utovu wa usalama vitadhibitiwa nchini lakini sio haki kwa maafisa wa usalama kutumia nguvu kupita kiasi wakati wanapopambana na wahalifu.

Khalid amesema japo Wanaharakati wa kutetea haki za kibinadamu wanaunga mkono juhudi zote za kukabiliana na wahalifu nchini lakini ni lazima juhudi hizo zizingatie sheria.

Kwa upande wake Afisa wa Shirika la Amnesty International Zaina Kombo, anataka kushurutishwa kwa serikali kuchukua hatua za haraka za kuzisaidia familia kutafuta wapendwa wao waliopotea katika hali tatanishi humu nchini.

Story by: Mwahoka Mtsumi

Serikali imeweka wazi kwamba Wizara mbalimbali nchini, idara za kiserikali na taasisi nyingenezo zinadaiwa zaidi ya shilingi bilioni 80 kufikia Disemba 31 mwaka wa 2022.

Mdhibiti wa bajeti nchini Margaret Nyakang’o amefichua kwamba kufikia Juni 30 mwaka wa 2022 taasisi hizo zilikuwa zinadaiwa shilingi bilioni 83.98 kati ya shilingi bilioni 62.8 zilizokuwa za matumizi ya kawaida na shilingi bilioni 21.2 za matumizi ya maendeleo.

Margaret amesema kulingana na ripoti iliyotolewa taasisi hizo zimelipa deni la shilingi bilioni 3.6 ambayo ni asilimia 4.4 pekee ya deni hilo na kubakisha shilingi bilioni 80.3.

Katika ripoti hiyo, Margaret amesema juhudi zinazoendelezwa na Rais William Ruto za kuinua uchumi wa nchi, huenda deni hilo litakamilishwa kulipwa na kumuwezesha mkenya mlipa ushuru kumudu gharama ya maisha.

Story by: Our Correspondents

Afisa wa Mamlaka ya kukabiliana na ukame kaunti ya Tana River Kennedy Omondi amesema zaidi ya wakaazi elfu 80 katika kaunti hiyo wanahitaji msaada wa dharura wa chakula.

Kulingana na Omondi, eneo la Tana Kaskazini ndilo limeathirika zaidi na ukame na kuna haja ya hatua za dharura kuchukuliwa ili kuwanusuru wakaazi wa eneo hilo wanaokabiliwa na kiangazi kikali.

Omondi amesema wakaazi hao wanaweza kusaidika kutokana na mpango wa cash transfer, chakula ama mpango wowote utakaovunja makali ya baa la njaa.

Amebainisha kuwa uwepo wa shamba la unyunyizaji la Hola na makao makuu ya kaunti ndiyo imepelekea uwepo wa mbinu mbalimbali za kuibuka na mikakati ya kuwasaidia wahanga wa njaa.

Story by: Charo Banda

Serikali ya kaunti ya Kilifi imeweka wazi kuwa bado elimu katika kaunti hiyo haijafikia viwango hitajika.

Naibu Gavana wa Kilifi, Flora Chibule amesema japo serikali ya kaunti ya Kilifi imepiga hatua kuhakikisha sekta ya elimu  ya chekechea inaboreshwa bado juhudi zaidi zinahitajika.

Chibule ametaja swala la umaskini, baa la njaa na muundo msing duni katika taasisi nyingi za kielimu kaunti ya Kilifi kama mojawapo ya changamoto zinazochangia kuzorota kwa sekta ya elimu.

Wakati uo huo amesema swala la mimba za utotoni katika kaunti hiyo limechangiwa na watu wa karibu wa familia ya muathiriwa, akisema ni lazima jamii ijitenga na hulka hiyo ndipo mtoto wa kike atatimiza ndoto yake.

Story by: Taalia Kwekwe

Mahakama ya Mombasa imeipa muda zaidi idara ya polisi nchini kukamilisha uchunguzi dhidi ya kesi ya mauaji inayomuandama mwanamume mmoja wa umri wa miaka 20.

Mahakama imeelezwa kwamba shtakiwa kwa jina Abdulaziz Swaleh, alitekeleza mauaji hayo baada ya kumtaka shingo nyanya yake mwenye umri wa 80 mnano tarehe 21 mwezi Januari mwaka huu katika eneo la mji wa Kale kaunti ya Mombasa.

Hakimu mkuu wa Mahakama hiyo Vincent Adet ameagiza mshtakiwa kufanyiwa uchunguzi wa akili kabla ya kurejeshwa tena Mahakamani

Hata hivyo kesi hiyo itatajwa mnamo tarehe 8 mwezi Februari mwaka huu.

Story by: Gabriel Mwaganjoni-

Shughuli za masomo zimekatizwa katika shule ya msingi ya Nyali eneo bunge la Nyali kaunti ya Mombasa baada ya wazazi wa shule hiyo kuandamana wakipinga kuajiriwa kwa Naibu mwalimu mkuu mpya shuleni humo.

Wazazi hao wakiongozwa na Uzel Jean wamesema Omar Babu ambaye amekuwa mwalimu mkuu wa shule hiyo kwa kipindi cha miaka 20 sasa ameiongoza shule hiyo vyema na kusajili matokeo bora zaidi ya mtihani wa darasa la nane KCPE na hatua ya kuondolewa kwake ni makosa.

Wazazi hao wakishirikiana na watetezi wa haki za kibinadamu kutoka Shirka la MUHURI wameapa kumbandua afisini Kaimu mwalimu mkuu Toney Ogunga wakisema kuajiriwa kwake kumefanywa kinyume hasa ikizingatiwa kwamba tayari shule hiyo ya kijami iliyo na zaidi ya wanafunzi 1,000 ina manaibu walimu wakuu wawili.

Kwa upande wao wazazi wa shule hiyo Mohammed Mohammed na Ahmed Twahir wamesema shughuli za shule hiyo zinaendelezwa kiholela na bodi hiyo, huku Katibu wa Bodi Paul Munyao akifanya maamuzi bila ya kuwahusisha wazazi wa shule hiyo.

Wakati uo huo, Twahir amemsihi Rais William Ruto na Waziri wa Elimu nchini Ezekiel Machogu kuingilia kati mzozo huo ili kuinusuru shule hiyo ambayo inakabiliwa na uongozi duni na visa vya wizi wa fedha za wazazi.

Tayari Wazazi wa shule hiyo wameishtaki bodi ya shule kwa madai ya wizi wa shilingi milioni 6 fedha za shule hiyo, na sasa wameapa kuwasilisha kesi ya pili mahakamani kuhusu swala la uajiri

Story by: Our Correspondents 

Aliyekuwa Balozi wa Kenya nchini Tanzania Chirau Ali Mwakwere ametangaza kujiuzulu wadhfa wake kama Mwenyekiti wa kitaifa wa chama cha WIPER na mwanachama wa chama hicho.

Katika mahojiano ya kipekee na Radio Kaya kwenye kipindi cha Voroni Enehu, Balozi Mwakwere amesema amechukua hatua hiyo kutokana na ubinafsi wa baadhi ya viongozi ndani ya Chama cha Wiper na itakuwa vigumu kwake kushikilia chama hicho ilhali Kirana wa Wiper Kalonzo Musyoka hakubali ushauri wa viongozi wengeni chamani.

Hata hivyo Balozi Mwakwere amekosoa mikutano ya hadhafra ya Muungano wa Azimio akisema mikutano hiyo huenda ikachangia chuki na migawanyiko ya kikabila nchini.

Wakati uo huo amesema ifikapo Februari 15 mwaka huu ataweka wazi msimamo wake wa kisiasa kwa wakenya huku akisisitiza umuhimu wa wakenya kuzingatia Katiba ya nchi na kudumisha amani.