Monthly Archives: December 2022

Story by Our Correspondents-

Muigizaji maarufu na mkongwe humu nchini Gibson Gathu Mbugua ameaga dunia akiwa na umri wa miaka 56.

Mbugua alifahamuka sana kama Kiongozi wa mashtaka {Prosecutor} katika kipindi cha Vioja Mahakamani kinachopeperushwa katika runinga ya kitaifa ya KBC ameaga dunia baada ya kuugua kwa miaka 20 ugonjwa wa kisukari na matatizo ya figo.

Mbugua ambaye alifanyiwa upasuaji na kubadilishiwa figo alikuwa anaendelea vizuri hadi kifo chake ambacho kimeshtusha wengi na kuchangia pengo kubwa katika Sanaa ya uigizaji.

Familia ya mbugua imethibitisha kifo chake na kusema kwamba mwendazake amefariki dunia mapema leo.

Hata hivyo wakenya wa tabaka mbalimbali wamejitokeza na kutuma rasala zao za rambirambi kwa familia ya Mbugua.

Story by Hussein Mdune-

Baadhi ya shule kutoka kaunti ya Kwale zimefanya vyema katika mtihani wa kitaifa wa darasa la nane KCPE huku shule ya msingi ya kibinafsi ya Mumtaz mwanafunzi wa kwanza akiwa ni Changoma Idd aliyepata alama 404.

Changoma Idd ambaye ni mwnafunzi wa kwanza shuleni humo amelezea furaha yake huku mwalimu mkuu wa shule hiyo Oliver Wafula akisema ni kupitia juhudi za wazazi na walimu ndio kumefanikisha matokeo bora.

Katika shule ya msingi ya Samburu mwanafunzi wa kwanza ni Leah Nadzua Tsimba aliyepata alama 397, Yusufu Kombo Juma akiwa wa pili kwa 381 na watatu akiwa Sofia Chari Jira aliyepata alama 372.

Hata hivyo Mwalimu mkuu wa shule hiyo Mgunya Mganga amewataka wazazi kuhakikisha watoto wao wanajiunga na shule za upili.

Hata hivyo shule ya msingi ya kibinafsi ya Muungano iliyoko Samburu wanafunzi wa kwanza ni Bilal Athman aliyepata alama 385, Joyleen Wakio akipata alama 384, Brian Maundu akipata alama 381 huku Mwalimu mkuu wa shule hiyo Alex Kombo akisema licha ya sehemu hiyo kukubwa na kiangazi juhudi za wazazi na walimu zimefanikisha matokeo hayo.

Story by Our Corresponents-

Waziri wa elimu nchini Ezekiel Machogu amesema wanafunzi 252 wa mtihani wa KCPE kutoka vituo tisa vya kufanyia mitihani walinaswa wakishiriki udangayifu na kupewa alama sufuri katika somo hilo.

Machogu amesema asilimia 100 ya wanafunzi zaidi ya milioni 1.2 waliofanya mtihani huo wa KCPE watapata nafasi kujiunga na shule za upili huku akihiji kwamba wanafunzi 2,417 wenye uwezo maalum na wanafunzi 7 kati yao wamepata alama ya 400 na zaidi.

Akizungumza wakati wa halfa ya kutangaza matokeo ya mtihani wa kitaifa wa KCPE katika jumba la mitihani house jijini Nairobi, Waziri Machogu amesema wanafunzi waliokamilisha gredi ya 6 wataendeleza masomo yao ya Junior secondary katika shule za msingi wanazosomea.

Vile vile ametangaza kwamba zoezi la kusajili wanafunzi waliokamilisha mtihani wa kitaifa wa KCPE katika shule mbalimbali za upili ikiwemo zile za kitaifa na kaunti litakamilika rasmi Januari 16 mwaka ujao huku mihula ya masomo ikirejea kama kawaida kuanzia Januari mwaka ujao.

Story Hussein Mdune-

Waziri wa Barabara na kazi za umma kaunti ya Kwale Ali Mwachiribi Joto amesema kuchelewa kwa mgao wa fedha za mwaka 2020/2021 kutoka kwa Bodi ya kitaifa ya maswala ya Barabara ndicho chanzo cha miradi mingi ya barabara kutoendelea kaunti ya Kwale.

Katika kikao na Wanahabari, Joto amesema mwaka huo hawajapokea fedha ambazo walikuwa wanapania kuendeleza miradi iliyokuwa imebuniwa kwenye wadi mbali mbali za kaunti hiyo hatua iliyochangia kukwamisha miradi hiyo.

Hata hivyo amesema wako na imani ya kuendeleza miradi ambayo ilikuwa imekwama baada ya Bodi hiyo kukubali ombi la mgao wa fedha.

Wakati huo huo amesema tayari wizara yake inaendeleza ujenzi wa kurekebisha Barabara kwenye wadi mbalimbali kaunti ya Kwale.

Story by Our Correspondents-

Mahakama kuu mjini Mombasa imefutilia mbali kesi ya mauaji iliyokuwa ikimuandama Waziri wa Jinsia na utumishi wa umma Aisha Jumwa.

Hatua hiyo imejiri baada ya Ofisi ya mkurugenzi wa Mashtaka ya umma nchini ODPP kuandikia barau Mahakama kuu ya Mombasa ikiomba kuiondoa kesi hiyo ya mauaji dhidi ya Jumwa.

Jaji wa Mahakama hiyo Ann Onginjo amesema kuondolewa kwa kesi hiyo ya mauaji dhidi ya Jumwa kwa kuzingatia kifungu cha 87 ibara ya kwanza {a} sio kizuizi cha Mahakama kufungulia upya Jumwa mashtaka dhidi yake.

Jaji Onginjo amesema Jumwa atahitaji kufika Mahakama kama shahidi wa kesi ya mauaji inayomkabilia Geoffrey Otieno Okuto ambaye awali alikuwa mlinzi wake wa kibinafsi alipokuwa mbunge wa Malindi wakati wa tukio hilo la mauaji lililotokea.

Itakumbukwa kwamba Jumwa na Okuto walishtakiwa baada ya kushuhudiwa kuusika na mauaji ya mfuasi wa chama cha ODM mwendazake Jola Ngumbao baada ya rabsha za kisiasa kuzuka wakati wa kampeni za uchaguzi mdogo wa wadi ya Ganda kaunti ya Kilifi.

Story by Our Correspondents-

Bunge la Seneti alasiri ya leo litakuwa na kikao maalum cha kujadili hoja ya kubanduliwa mamlakani kwa Gavana wa Meru Kawira Mwangaza iliyowasilishwa mbele ya bunge hilo na wawakilishi wadi wa kaunti ya Meru wiki iliyopita.

Spika wa bunge la Seneti Amason Jefwa Kingi amesema kikao hicho ni cha dharura ikizingatiwa kwamba bunge liko katika likizo lakini kutokana na uzito wa hoja hiyo imelizalizimu bunge kuijadili.

Spika Kingi amesema tayari Kiongozi wa walio wengi katika bunge la Seneti Aaron Cheruiyot na Spika wa bunge la kaunti ya Meru Ayub Bundi wamechapisha

nakala ya hoja hiyo katika gazeti rasmi la serikali baada ya kukamilisha ripoti ya kubanduliwa mamlakani Gavana Kawira.

Maswala yanayomuandama Gavana Kawira ni pamoja na utumizi mbaya wa afisi ya umma, kutumia mamlaka yake vibaya na kufanya uteuzi wa viongozi kwa kukosa kuzingatia kanuni na sheria.

Story by Ephie Harusi-

Afisa wa idara ya upelelezi wa makosa ya jinai nchini DCI, George Mitikowea Nangoye amefikishwa katika Mahakama ya Kilifi kwa madai ya kumnajisi mtoto wa umri wa miaka 16.

Mahakama imeelezwa kwamba afisa huyo, alitekeleza kitendo hicho mnamo mwezi Septemba mwaka 2021 katika eneo la Marereni gatuzi dogo Magarini kaunti ya Kilifi.

Mahakama imebaini makosa manne katika kesi hiyo ambapo wa afisi huyo wa DCI anadaiwa kuyatekeleza ikiwemo kosa la unajisi, kutumia mamlaka yake vibaya, kunyanyasa kingono na kufanya uzembe.

Akiwa mbele ya Hakimu wa Mahakama hiyo Geoffrey Kimang’a, mshukiwa amekana shtaka hilo na Mahakama ikamuachilia kwa dhamana ya shilingi laki mbili ama pesa taslimu shilingi elfu 40.

Kesi hiyo itatajwa Januari 11 mwaka ujao.

Story by Janet Shume-

Wadau wa kimazingira katika kaunti ya Kwale wamesema utupaji taka ovyo ikiwemo vifaa vya kielektroniki na chupa za plastiki umechangia uharibifu wa mazingira pamoja na kuathiri afya ya binadamu.

Mkurugenzi wa Mamlaka ya mazingira nchini NEMA tawi la kaunti ya Kwale, Godfrey Wafula ameitaka jamii kutambua umuhimu na kufuata kanuni za utupaji taka hususan za kielektroniki ili kupunguza athari za kimazingira.

Wafula amesema ni lazima wananchi wawe waangalifu sawa na kuyalinda mazingira

Wafula amewataka wakaazi kushirikiana na wahusika wanaoshughulikia utupaji taka za kielektroniki ili kuzuia madini ya vyuma hivyo kuingia katika mazingira na kusababisha athari mbalimbali ikiwemo uchafuzi wa maji.

Story by Hussein Mdune-

Wadau wa maswala ya elimu kaunti ya Kwale wamesema sekta ya elimu nchini itaimarika zaidi iwapo Wizara ya elimu nchini itashirikiana na wadau hao hadi mashinani.

Wadau hao wakiongozwa na Hamisi Rai Nyondo wamesema kuna haja ya idara zingine za kiserikali kushirikiana ili wanafunzi wasaidike zaidi kimasomo na kuboresha viwango vya elimu kanda ya Pwani.

Hamis ambaye pia ni Mkurugenzi wa shule ya kibinafsi ya Muungano amesema endapo sekta zengine zitashirikiana na wadau wa elimu basi visa vya dhulma dhidi ya watoto vitapungua kaunti ya Kwale.

Wakati huo huo amewataka wazazi kuwajibikia majukumu yao ya ulezi wakati huo ambapo watoto wako nyumbani kwa likizo ndefu ya mwezi Disemba.

Story by Our Correspondents-

Seneta wa kaunti ya Lamu Joseph Githuku amesema iwapo viongozi wa kaunti ya Lamu watashirikiana vyema basi tatizo la mzozo wa ardhi katika kaunti hiyo litapata suluhu.

Akizungumza mjini Hindi katika kaunti hiyo, Githuku amewahakikishia wakaazi wa kaunti hiyo kwamba swala hilo tata litapata suluhu la kudumu.

Githuku amesema mikakati hiyo tayari inaendelea ili kuhakikisha wakaazi wa kaunti hiyo hawasumbuliwi tena na mabwenyenye na badala yake waishi katika ardhi zao bila ya usumbufu.

Wakati uo huo ametoa wito kwa serikali ya kaunti ya Lamu kulipa kipaumbele swala la ugavi wa ardhi kwa wenyeji ili kukomesha matumizi mabaya ya swala la ardhi na wanasiasa.