Monthly Archives: October 2022

Story by Janet Shume–

Shirika la kijamii la Crawn Trust limezihimiza serikali za kaunti hususan ukanda wa Pwani kuhakikisha zinaunda na kutekeleza sheria za kupambana na athari za mabadiliko tabia nchi.

Afisa wa shirika hilo Nobert Nyendere, amesema kufikia sasa ni kaunti 39 pekee kati ya 47 humu nchini ambazo wameweka sheria za kupambana na mabadiliko tabia nchi.

Aidha amesema huenda kaunti ambazo hazijaweka sheria hizo zikakosa kunufaika na fedha zinazolenga maeneo yaliyoathirika pakubwa na mabadiliko tabia nchi.

Akizungumza katika kongamano la wanawake eneo la Diani kaunti ya Kwale, afisa wa shirika hilo Cindy Kobei, amesema kwa sasa wanaendeleza hamasa kwa wanawake wa kaunti hiyo kuhusiana na suala zima la mabadiliko tabia nchi, umuhimu wa kuhudhuria vikao vya umma pamoja na masuala ya bajeti.

Amesema hatua hiyo itachangia pakubwa wanawake kupaza sauti kwa serikali za kaunti kutekeleza miradi inayowafaa ikiwemo ile ya kupambana na athari za mabadiliko tabia nchi.

Story by Janet Shume-

Maafisa wa polisi kaunti ya Kwale wanamzuilia kijana mmoja kwa jina Hamisi Jira aliyepatikana akisafirisha kwa pikipiki vyuma vya mifereji ya maji vilivyong’olewa kutoka kwa mradi wa maji wa serikali.

Polisi wamesema Hamis ametiwa nguvu katika wadi ya Puma eneo bunge la Kinango akiwa na mwenzake aliyefanikiwa kutoroka.

Afisa mkuu wa usalama eneo hilo Selina Kiluga amesema tayari uchunguzi umeidhinishwa wa kumsaka kijana aliyetoweka wakati wa oparesheni hiyo.

Aidha amewahimiza wakaazi kushirikiana na maafisa wa usalama kuripoti visa vyovyote vya kihalifu ikiwemo vya uharibifu na wizi wa mabomba na vyuma vya maji ili wahusika wachukuliwe hatua.

Story by Our Correspondents–

Rais William Samoei Ruto amemteua Amin Mohammed Ibrahim kuwa Mkurugenzi mkuu wa idara ya upelelezi wa jinai nchini DCI.

Katika tangazo lililochapishwa kwenye gazeti rasmi la serikali, Rais Ruto amemteua Ibrahim kushikilia nafasi hiyo iliyoachwa wazi na George Kinoti baada ya kujiuzulu.

Ibrahim anatarajiwa kuanza majukumu yake rasmi baada kuapishwa kwa mujibu wa sheria.

Hata hivyo Ibrahim atakuwa na kibarua kigumu cha kutegua kitendawili cha sakata za ufisadi ambazo zimekuwa changamoto kukabiliwa wakati nafasi hiyo ilipokuwa ikishikiliwa na Kinoti.

Sintofahumu za watu kupotea katika hali tatanishi ni maswala ambayo wakenya wengi hasa kutoka eneo la Pwani wanatarajia kuona yakikomeshwa na usalama kuimarishwa.

Story by Janet Shume-

Viongozi wa baraza la makanisa nchini NCCK tawi la Pwani wamefanya kikao na viongozi mbalimbali wa kike kaunti ya Kwale kujadili changamoto zilizowakumba katika uchaguzi na jinsi wanavyoweza kuzikabili siku zijazo.

Wakiongozwa na Mwenyekiti wa baraza hilo kanda ya Pwani Askofu Peter Mwero viongozi hao wamesema baraza hilo limekuwa likishirikiana kwa karibu mno na viongozi wa kike kupitia mradi wa Wadada wa Pawa ili kuwajenga uwezo.

Kiongozi huyo wa kidini amewahimiza viongozi wote wa kike kaunti ya Kwale na pwani kwa ujumla hususan wale ambao hawakufaulu kushinda katika nyadhfa za kisiasa kujitahidi zaidi ili kuwania nyadhfa za juu zaidi siku za usoni.

Kwa upande wake Edah Wamboi, kiongozi wa wanawake katika baraza hilo kaunti ya Kwale, amesema kupitia mradi huo wa Wadada wa Pawa jamii imeweza kupata mafunzo na kukumbatia uongozi wa wanawake.

Hata hivyo viongozi mbalimbali waliohudhuria kikao hicho wakiongozwa na aliyepigania uwakilishi wanawake kaunti hiyo Bibi Masha,wamelitaka baraza hilo kuendelea kuwashika mkono viongozi wanawake ili kuwajenga uwezo.

Story by Janet Shume-

Serikali ya kaunti ya Kwale imetoa onyo kali kwa wale wanaoendeleza uharibifu wa mabomba ya maji na kujiunganishia wenyewe kinyume cha sheria kwamba watachukuliwa hatua kali za kisheria.

Gavana wa Kwale Fatuma Achani amesema kumeshuhudiwa ongezeko la visa hivyo vya ukataji mabomba ya maji kiholela akihoji kwamba hali hiyo imechangia kukithiri kwa uhaba wa maji katika maeneo mbalimbali ya kaunti hiyo.

Achani amesema hatua hizo zitahakikisha wakaazi wa kaunti ya Kwale wananufaika na huduma bora za maji huku akiwarai wakaazi kulinda raslimali za kaunti hiyo.

Kwa upande wake Kamishna wa kaunti hiyo Gideon Oyagi amewataka wakaazi kuripoti visa hivyo kwa maafisa wa usalama ili washukiwa wachukuliwe hatua kali za kisheria.

Story by Janet Shume-

Mashirika mbalimbali ya kijamii yamependekeza ngazi zote za serikali kushirikiana ili kuweka mpango wa kusambaza sodo katika shule za msingi na sekondari katika kaunti ya Kwale.

Mashirika hayo yakiongozwa na Shirika la Adis Clinic kupitia afisa wake wa Afya Caroline Wanjiru amesema hatua hiyo itapunguza visa vya wasichana kukosa masomo nyakati za hedhi.

Caroline amesema wasichana wengi kutoka jamii zisizojiweza hususan eneo bunge la Kinango na Lungalunga katika kaunti hiyo wameacha shule kutokana na ukosefu wa sodo. 

Wakati uo huo ameitaja hali hiyo ya wasichana kusalia nyumbani kutokana na ukosefu wa Sodo kupelekea baadhi yao kuingia katika ndoa za mapema pamoja na kuajiriwa ili kuwasaidia wazazi na majukumu ya kinyumbani hali ambayo ni kinyume cha sheria.

Story by Mimuh Mohamed-

Mahakama ya kutatua mizozo ya uajiri na leba imeizuia kwa muda Tume ya huduma za umma nchini PSC, dhidi ya kuidhinisha afisi ya katibu mkuu muandamizi maarufu CAS.

Jaji wa Mahakama hiyo Monica Mbaru ametoa uamuzi huo kufuatia kesi iliyowasilishwa na chama cha mawakili nchini LSK, akisema muelekeo kuhusu afisi ya CAS utatolewa baada ya kesi hiyo kuamuliwa.

Jaji Mbaru katika uamuzi wake vile vile ameagiza chama cha LSK kuikabidhi tume ya huduma za umma nchini pamoja na mkuu wa sheria nchini nakala kuhusu kesi hiyo kabla Oktoba 14 huku kesi hiyo ikitarajiwa kusikilizwa tarehe 24 mwezi huu.

Katika kesi hiyo LSK imelalamika kutokua na uwazi kuhusu majukumu ya afisi ya CAS kwani kunawanyima wananchi fursa ya kutoa maoni kuhusu uwezekano wa kufanana kwa majukumu kati ya afisi ya CAS na ile ya makatibu.

Uamuzi huo wa Mahakama hata hivyo unajiri huku Tume ya huduma za umma nchini kupitia Mwenyekiti wake Antony Muchiri ikiwa tayari imewataka wakenya kutuma maombi ya kujaza nafasi hizo za CAS.

Story by Gabriel Mwaganjoni-

Serikali ya kaunti ya Mombasa imetakiwa kuwekeza angalau shilingi milioni 100 kwa kila eneo bunge la kaunti hiyo ili kuwakimu vijana kwa elimu ya juu zaidi.

Mbunge wa Changamwe Omar Mwinyi amesema japo vijana wana ari ya kujiendeleza kimasomo, wengi wao wamekosa uwezo wa karo.

Akizungumza katika eneo bunge la Changamwe, Mwinyi amesema wavulana wamelegeza kamba katika swala la kusaka elimu ya juu sababu kuu ya wao kupotoka na kujitosa katika uraibu wa mihadarati na uhalifu.

Wakati uo huo amesisitiza umuhimu wa vijana kuwa wabunifu na kujiajiri wenyewe.