Monthly Archives: May 2022

Story by Mimuh Mohammed –

Shirika la Afya duniani WHO limeeleza kwamba watu milioni 8 hufariki kila mwaka ulimwenguni kutokana na utumizi wa bidhaa zinazotokana na tumbaku.

WHO katika ujumbe wake wakati maadhimisho ya siku ya kupinga matumizi tumbaku duniani, limebainisha kwamba Tumbaku pia limechangia uharibifu wa mazingira na afya ya binadamu kupitia ukuzaji, usajilisha, usambazaji na utumizi wa bidhaa za tumbaku.

Katika ripoti hiyo inayoangazia athari ya Tumbaki WHO vile vile imesema kufikia sasa miti milioni 600 imekatwa kwa ajili ya kutengeneza tumbaku huku tani milioni 84 za hewa kaa inayotokana na moshi wa sigara ikichangia kupanda kwa joto duniani.

Wizara ya afya nchini imeandaa hafla ya kuadhimisha siku ya kupinga matumizi ya tumbaku duniani katika chuo kikuu cha Nairobi, ambapo mkurugenzi wa afya nchini Dkt Patrick Amoth ni kati ya wanaohudhuria hafla hiyo na kusisitiza haja ya wakenya kujitenga na matumizi ya tumbaku.

Story Gabriel Mwaganjoni-

Wakereketwa wa haki za kibinadamu kaunti ya Mombasa chini ya mwavuli wa Okoa Mombasa wameitaka Serikali kuweka wazi stakabadhi zote zinazofungamana na mradi wa SGR.

Wakereketwa hao wamesema licha ya mahakama kuamuru Serikali kutoa stakabadhi hizo serikali bado imedinda kutii amri ya Mahakama.

Wakiongozwa na Mwenyekiti wa Shirika la MUHURI Khelef Khalifa, wakereketwa hao wamehoji kwamba mradi huo wa SGR umepelekea wakenya kutozwa kodi za juu ili kuugharamia mradi huo.

Katika mkao na wanahabari katika afisi za Shirika hilo eneo la Nyali kaunti ya Mombasa, Khalifa amemkosoa mkuu wa Sheria nchini Paul Kihara kwa kutishia kufika mahakamani ili kuzima juhudi za watetezi hao wa haki za kibinadamu.

Mradi huo wa reli ya kisasa al-maarufu Standard Gauge Railway-SGR uliigharimu Serikali kima cha shilingi bilioni 450, na umetajwa kuwa mradi wa kipekee nchini uliyogahrimu kiasi kikubwa cha pesa katika Serikali ya Jubilee.

Story by Gabriel Mwaganjoni-

Kesi inayohusu mzozo wa ardhi kati ya zaidi ya familia 3,000 na kampuni tatu tofauti zinazodai umiliki wa ardhi ya ukubwa wa ekari 55 ya Utange katika eneo bunge la Kisauni kaunti ya Mombasa imerudi tena Mahakamani baada ya kusitishwa kwa kipindi cha miaka 6.

Katika kesi hiyo, Wakaazi wanaoishi katika ardhi hiyo Wakiongozwa na Stephen Safari wamekishtaki Chama cha Ushirika cha Bamburi Wananchi Sacco, Khatiby Group of Companies Limited na mwekezaji wa kibinafsi raia wa Bara Asia kwa madai ya umiliki wa ardhi hiyo licha ya kukosa stakabadhi halisi za kuthibitisha umiliki huo.

Mawakili wa maskwota hao waliyovunjiwa nyumba zao wakiongozwa na William Kenga na Omondi Okanga wameiambia Mahakama kwamba chama hicho kiliinyakua ardhi hiyo na stakabadhi wanadai kuwa nazo za kuonyesha kwamba walinunua ardhi hiyo tangu mwaka wa 1982 ni uongo.

Chama cha ushirika cha Bamburi wananchi Sacco kimeiambia mahakama kwamba kilitumia kima cha shilingi milioni 1.8 kununua kipande cha ardhi hiyo iliyo katika eneo la Utange japo usimamizi wake ulipotakiwa kuwasilisha stakabadhi za kuonyesha ununuzi huo ulishindwa kuonyesha stakabadhi hizo na kuzua utata mahakamani.

Kesi hiyo inaendelea huku maskwota hao wakiwasilisha mbele ya Jaji Naikuni matakwa yao ya kutaka hati miliki zote za ardhi zinazomilikiwa na watatu hao kufutiliwa mbali wakishikilia kwamba watatu hao walinyakua ardhi hiyo.

Story by Gabriel Mwaganjoni

Mali ya thamani ya maelfu ya pesa imeteketea baada ya moto kuteketeza jumba la kibiashara katika mzunguko wa barabara ya Fontanella katikati kwa mji wa Mombasa.

Moto huo umetajwa kuchangiwa na hitilafu za nyaya za kusambaza umeme katika jumba hilo la ghorofa tatu na lililo na vyumba vingine vya chini ya ardhi.

Maduka yaliyoripitiwa kuteketea katika jumba hilo ni pamoja na lile la kampuni ya mawasiliano nchini Safaricom, taasisi ya kifedha, kituo cha kuadilisha sarafu za kigeni, maduka ya vifaa vya eletroniki, miongoni mwa maduka mengine.

Imewachukua wazima moto kutoka serikali ya kaunti ya Mombasa masaa mengi kuukabili moto huo, shughuli iliyokabiliwa na vikwazo vingi hasa ikizingatiwa kwamba moto huo umeanza sehemu ya chini ya ardhi ya jengo hilo kabla ya kupanda juu ya ghorofa hizo.

Hata hivyo, moto huo umethibitiwa baadaye na wamiliki wa maduka kuamrishwa kusalia nje ya jumba hilo kadri juhudi za kukagua usalama wa jumba hilo zilipokuwa zikiendelezwa na watalaam wa mikasa ya moto.

Story by Gabriel Mwaganjoni 

Maafisa wa polisi katika kaunti ya Mombasa wameidhinisha uchunguzi kuhusu kifo cha mwanamume mmoja katika mtaa wa Kiziwi eneo la Tudor Kisiwani Mombasa.

Mwanamume huyo aliyetambulika kama mfanyabiashara, anadaiwa kupigwa risasi mara kadhaa na kuuliwa ndani ya gari lake pambizoni mwa maziara ya manyimbo eneo hilo la Tudor.
Polisi hata hivyo walifika mahali hapo na kuuchukua mwili wa jamaa huyo na kuupeleka katika hifadhi ya maiti ya hospitali kuu ya Ukanda wa Pwani.

Hakuna taarifa zaidi iliyotolewa na maafisa wa polisi kuhusiana natukio hilo japo tayari uchunguzi umeidhinishwa ili kubaini kiini cha tukio hilo.

Story by Our Correspondents

Rais Uhuru Kenyatta amezindua rasmi kampeni ya kitaifa ya ukuaji wa miti kwa kasi kama njia moja wapo ya kukabiliana na mabadiliko ya tabia nchi.

Akizungumza wakati wa halfa hiyo iliyoandaliwa katika Ikulu ya Nairobi, rais Kenyatta amesema hatua hiyo itachangia uimarishaji wa mazingira nchini huku akidokeza kwamba tayari taifa limeanza safari ya kuongeza idadi ya misitu nchini ili kufikia asimilia 30 ya misitu nchini ifikapo mwaka wa 2050.

Kiongozi wa taifa amehimiza umuhimu wa wakenya kuhakikisha wanakumbatia mpango wa upanzi wa miti nchini ili kuboresha mazingira sawa na kuchangia chemichemi za maji ili kukabiliana na kiangazi kikali kinachochangiwa na mabadiliko ya tabia nchi.

Wakati uo huo, Rais Kenyatta amedokeza kwamba serikali imeanzisha hazina ya kukuza miti kimataifa kwa ushirikiano na wadau mbalimbali ikiwemo Multi partner Trust Fund.

Story by Janet Shume

Mgombea mwenza wa urais katika muungano wa Azimio la Umoja One Kenya Martha Karua amekutana na wawakilishi wa mashirika ya kijamii nchini ili kujadili jinsi watakavyoshirikiana endapo wataigia ikulu.

Akizungumza wakati wa kikao hicho, Karua ameahidi kushirikiana na mashirika ya kijamii humu nchini kuhakikisha visa vya ukiukaji wa haki za binadamu vinavyoripotiwa vinakabiliwa kwa mujibu wa sheria.

Karua amewahimiza wakenya pamoja na mashirika ya kutetea haki za kibinadamu kote nchini kutosalia kimya sawa na kutokubali vitisho vya aina yeyote ili kuhakikisha ukandamizaji wa wananchi unakomeshwa.

Karua ameshikilia kwamba taifa hili linahitaji uongozi bora utakaoweka mikakati ya kupambana na ufisadi sawa na kuidhinishwa mipangilio bora ya kulipa deni la taifa.

Story by Our Correspondents

Kauli za kusameheana zimerindima katika halfa ya 19 ya maombi ya kitaifa yaliandaliwa katika hoteli ya Safari Park jijini Nairobi huku viongozi wa kidini wakichukua jukumu la kuhimiza umuhimu wa kusameheana.

Akihutubia wakenya wakati wa halfa hiyo, Rais Uhuru Kenyatta amesema taifa hili litashuhudia amani iwapo wakenya na viongozi mbalimbali wataungana na kuzidi maombi huku akihimiza kila mmoja kuwa balozi wa amani.

Naye Naibu Rais Dkt William Ruto aliyehudhuria halfa hiyo amemuomba msamaha Rais Kenyatta kutokana na tofuati zao za kisiasa huku akiahidi kuwasamehe wale wote waliotofautiana katika njia moja ua nyengine ili taifa hili lishuhudie uchaguzi wa amani.

Kwa upande wake Askofu mkuu wa Kanisa la kianglikana nchini Jackson Ole Sapit amewasihi wakenya kusameheana na kuishi kwa upendo kwa ajili ya mshikamano wa taifa hili.

Hata hivyo Askofu mkuu wa Kanisa la Katoliki jimbo la Nyeri, Antony Muheria amewataka wakenya kuzidisha maombi ili taifa hili lisonge mbele kimaendeleo sawa na kushuhudiwa kwa uchaguzi huru na haki.

Story by Gabriel Mwaganjoni

Uongozi wake Mgombea wa ugavana wa kaunti ya Mombasa Mike Mbuvi Sonko na mgombea mwenza wake Ali Mbogo utaleta mabadiliko msingi ya maendeleo kwa wakaazi wa kaunti hiyo.

Haya ni kulingana na Mbogo ambaye pia ni Mbunge wa Kisauni, aliyesmea ni sharti kaunti ya Mombasa ipate uongozi bora na utakaomjali kila mkaazi na wala sio uongozi wa kuwapendelea watu fulani na kuwabagua wengine.

Wakizungumza katika eneo la Shanzu katika kaunti ya Mombasa, Mbogo amesema hawatarudi nyuma katika azma yao ya kuikomboa kaunti ya Mombasa.

Wakati uo huo amewarai wakaazi wa Mombasa kutoingiwa na hofu yoyote wala kutotishiwa na mirengo fulani ya kisiasa na badala yake kuunga mkono juhudi zake na Sonko katika kuufanikisha mchakato wa kimaendeleo katika kaunti hiyo.

Story by Gabriel Mwaganjoni

Japo bado mazungumzo yanaendelea kati ya Muungano wa Azimio la Umoja-One Kenya na Chama cha Wiper kuhusu uwezekano wa Kinara wa chama cha Wiper Stephen Kalonzo Musyoka kurudi tena kwenye muungano huo, kwa sasa Kalonzo ni mgombea wa urais wa chama hicho katika uchaguzi mkuu wa Agosti, 9.

Haya ni kulingana na Mwenyekiti wa kitaifa wa Chama cha Wiper Balozi Chirau Ali Mwakwere aliyesema msimamo uliyoko kwa sasa ni kwamba Kalonzo ni Mgombea wa  urais na endapo kutakuwa na mabadiliko yoyote basi wakenya watafahamishwa.

Katika kikao na Wanahabari katika kaunti ya Mombasa, Balozi Mwakwere amekariri kwamba ni usimamizi wa chama cha Wiper pekee uliyo na mamlaka ya kutangaza msimamo wa chama, akisema usimamizi wa chama hicho unapokea maoni ya wanachama kuhusu msimamo wa Kalonzo.

Kwa upande wake, Katibu mkuu wa chama cha Wiper Shakillah Abdallah amemkosoa mgombea wa urais wa Azimio la Umoja Raila Odinga kwa kumhadaa Kalonzo licha ya kumuahidi kwamba angekuwa mgombea mwenza wake.