Monthly Archives: January 2022

             Story by Ali Chete –

Mwenyekiti wa Shirika la utetezi wa haki za kibinadamu nchini MUHURI Khelef Khalifa ameandikisha taarifa katika makao makuu ya idara ya upelelezi nchini DCI kaunti ya Mombasa baada ya kuamrishwa kufanya hivyo.

Akizungumza na Wanahabari baada ya kuandikisha taarifa ya madai ya kutoa matamshi ya uchochezi, Khalifa amesema hatalegeza msimamo wake wa kusema ukweli kuhusu uongozi wa taifa hili huku akidai kwamba kauli aliyoitoa haikukiuka katiba.

Kwa upande wake Afisa wa Shirika la Haki Yetu Julius Wanyama amesema kama mashirika watasimama na kauli ya Mwanaharakati huyo na kutetea haki za wapwani.

Hata hivyo Mkurugenzi mkuu wa shirika la kutetea haki za kibinadamu nchini HAKI Africa Hussein Khalid amesema kauli iliyotolewa na Khalifa haikuwa na makosa ikizingatiwa kwamba uchumi wa ukanda wa pwani umedorora.

             Story by Hussein Mdune –

Mgombea wa kiti cha uwakilishi wadi ya Puma katika kaunti ya Kwale Mrinzi Nyundo ameihimiza idara ya usalama nchini kuweka mikakati mwafaka ya kuhakikisha usalama unaimarishwa wakati huu siasa za uchaguzi mkuu.

Mrinzi ameweka wazi kwamba kwa sasa visa vya utovu wa usalama vinashuhudiwa katika sehemu mbalimbali za nchi hivyo basi kuna haja ya usalama kuimarishwa ili kufanikisha uchaguzi wa amani.

Hata hivyo amewahimiza wakaazi wa Puma na kaunti ya Kwale kwa ujumla kujitenga na siasa za ukabila na badala yake kuungana kama wakenya sawa na kudumisha amani.

Wakati uo huo amewataka wakaazi wa wadi ya Puma na Kwale kwa ujumla kujitokeza kwa wingi katika zoezi la usajili wa wapiga kura.

            Story by Hussein Mdune –

Mwanaharakati wa maswala ya kijamii katika eneo la Samburu/chengoni Emmanuel Kadudze Ndaro amewahimiza wakaazi wa eneo hilo na kaunti ya nzima ya Kwale kujitenga na wanasiasa wenye nia ya kuwagawanya katika misingi ya dini na ukabila.

Akizungumza na wakaazi wa eneo hilo, Kadudze amesema wakati huu ambapo kampeni za uchaguzi mkuu zimepamba moto ni lazima kila mmoja kuwa makini dhidi ya semi za viongozi ili eneo hilo lishuhudie amani na maendeleo.

Kadudze ambaye ametangaza nia yake ya kuwania kiti cha uwakilishi wadi wa Samburu/Chengoni amewata wakaazi wa wadi hiyo kuzidi kudumisha amani sawa na kutokubali kutumiwa vibaya na wanasiasa.

Wakati uo huo amewasisitiza wakaazi wa wadi hiyo kujitokeza kwa wingi katika zoezi la usajili wa wapiga kura na kujiandikisha kama wapiga kura ili wapate nafasi ya kushiriki uchaguzi mkuu ujao.

              Story by Our Correspondents-

Kinara wa Chama cha ODM Raila Odinga amevunja kimya chake na kukosoa kauli ambazo zimekuwa zikitolewa na wanasiasa humu nchini kwamba uhusiano wake wa karibu wa kisiasa na Rais Uhuru Kenyatta huenda ikawa anatumika kama mradi wa serikali.

Akizungumza katika eneo bunge la Kieni katika kaunti ya Nyeri wakati wa halfa ya mazishi ya Jucinta Wanjiku aliye mamake Naibu Gavana wa kaunti hiyo, Odinga amesema yeye sio mradi wa serikali na tayari ameukwea mlima Kenya bila ya usaidizi wa rais Kenyatta.

Odinga amesema ana malengo ya kubadili uongozi wa taifa hili na kupitia mpango wake wa Azimio la umoja ni lazima wakenya wote waungane kwani kwa kufanya hivyo ndio taifa hili litapiga hatua kimaendeleo.

Kwa upande wake Gavana wa Nakuru Lee Kinyanjui aliyeandamana na Odinga katika halfa hiyo ya mazishi, amesema wakenya watakuwa salama baada ya uchuguzi mkuu iwapo watamuunga mkono Odinga kuingia Ikulu.

                Story by Our Correspondents –

Rais Uhuru Kenyatta amefanya kikao cha kiusalama na wakuu wa vitengo vya usalama humu nchini mda mchache tu baada ya ubalozi wa Marekeni, Ufaransa, Uholanzi na Ugerumani kutoa ilani ya tishio la kigaidi.

Katika taarifa iliyotumwa kwa vyombo vya habari na Msemaji wa Ikulu ya Rais  Kanze Dena Mararo, wakuu hao wa usalama wamemhakikisha rais kuimarishwa kwa usalama katika kila pembe ya taifa hili.

Katika kikao hicho kilichoandaliwa katika Ikulu ya Nairobi, Rais Kenyatta amesisitiza haja ya maafisa wa usalama kujizatiti zaidi katika kuimarisha usalama wa taifa hili ikiwemo ardhini, majini na angani ili kuhakikisha taifa la Kenya iko salama.

Kikao hicho cha usalama kimehudhuriwa na Waziri wa usalama wa ndani nchini Dkt Fred Matiang’i, Inspekta mkuu wa polisi nchini Hillary Mutyambai, waratibu wakuu wa serikali, makamishna wa kaunti pamoja na wakuu wa idara zengine za kiusalama.

                               Story by Ephie Harusi –

Waziri wa Afya katika serikali ya kaunti ya Kilifi Charles Dadu amesema kaunti hiyo imewekeza kikamilifu katika miundo msingi ili kuboresha afya ya akina mama katika kaunti hiyo.

Akizungumza wakati wa halfa ya kupokea ufadhili wa vifaa mbalimbali vya kiafya kwa wadi ya akina mama ya kujifungua kutoka kwa wakfu wa Sportpesa katika hospitali ya Kilifi, Dadu amesema kaunti ya Kilifi imelipa kipau mbele swala la afya.

Waziri huyo amewataka wahudumu wa afya kudumisha uhusiano mwema kati yao na wagonjwa wanaofika hospitalini kutafuta huduma za matibabu.

Kwa upande wake msimamizi wa wadi ya akina mama ya kujifungua katika hospitali hiyo Janet Rotich amesema huduma za uzazi zitaboreshwa zaidi.