Monthly Archives: December 2021

                 Story by Gabriel Mwaganjoni –

Mahakama ya Shanzu imemhukumu mwanamke mmoja mashukiwa wa ulanguzi wa dawa za kulevya kifungo cha maisha gerezani na pia kumuamuru alipe faini ya shilingi milioni 22.1.

Hakimu mkaazi wa mahakama ya Shanzu David Odhiambo amesema Fatuma Sicobo Mohammed alinaswa na kilo 2.4 za dawa za kulevya aina ya Heroine katika eneo la Shanzu mwaka wa 2019.

Odhiambo amesema ushahidi uliyotolewa mahakamani umethibitisha kwamba Fatuma alikuwa na dawa hizo za kulevya nyumbani kwake na akazitupa kupitia dirishani pindi alipowaona maafisa wa kitengo cha kupambana na ulanguzi wa dawa za kulevya.

Hata hivyo, Mahakama amemuachilia huru mshukiwa wengine Masuo Bakari Tajiri kufuatia kukosekana kwa ushahidi wa kumhusisha na kesi hiyo.

Mahakama imetaka dawa hizo za kulenya kuharibiwa kabla ya tarehe 30 mwezi Januari mwaka wa 2022, huku ikitaka faini hiyo ya shilingi milioni 22.1 ilipwe kabla ya Fatuma kuanza kutumikia kifungo chake cha maisha gerezani.

                Story by Salim Mwakazi –

Idara ya Mahakama imelaumiwa kwa kushindwa kuzishughulikia kesi za dhulma za kijinsia zinazowasilishwa Mahakamani.

Mkurugenzi mkuu wa Shirika la kijamii la Sauti ya wanawake Millicent Odhiambo amesema hali hiyo imechangia waathiriwa wa dhulma hizo kuhisi kunyanyasika kwa kukosa haki.

Akizungumza na Wanahabari, Millicent amesema kucheleweshwa kwa kesi hizo kusikizwa na kuamuliwa Mahakamani kumechangia wakenya wengi kutokuwa na imani na utendakazi wa idara ya Mahakama.

Kwa upande wake Kadhi wa Mahakama ya Kwale Sheikh Salim Mwaito amesema idara ya Mahakama inajitahidi kuhakikisha kila mtu anapata haki kwani kesi zinazowasilishwa Mahakamani husikizwa kwa wakati.

                Story by Ephie Harusi-

Katibu mkuu msimamizi katika Wizara ya habari, teknolojia na mawasilisiano nchini Eric Kiraithe amesema serikali imeweka mikakati ya kupambana uwizi mitandaoni ambao umekuwa ukitekelezwa.

Kiraithe amesema mpango huo utadhibiti visa vya wananchi kulaghaiwa mitandaoni kwani idadi kubwa ya wakenya wamekuwa wakipoteza fedha nyingi kutipitia mitandao.

Akizungumza na Wanahabari katika kaunti ya Kilifi, Kiraithe amesema mikakati hiyo itachangia kila kituo cha usalama nchini kuwa na afisa aliye na utaalam wa kupambana na uwizi mitandaoni.

Wakati uo huo amewatahadharisha wananchi dhidi ya kufungua faili au vitu wa sivyo vifahamu vinapotumwa mitandaoni, akisema faili hizo huenda zinakawa na ushawishi wa kutoa taarifa za binafsi kwa walaghai.

            Story by Rasi Mangale –

Msemaji wa Serikali kanali mstaafu Cyrus Oguna amewahimiza vijana kuzidi kudumisha amani wakati huu ambapo taifa linajiandaa kwa uchaguzi mkuu ujao.

Akizungumza na Wanahabari baada ya kukutana na makundi ya vijana katika ukumbi wa Social hall mjini Kwale, Oguna amesema vijana wanafaa kuwa makini na kujitenga na wanasiasa wasiojali malengo ya vijana.

 Oguna hata hivyo amedokeza kwamba serikali ina malengo ya kununua ng’ombe 2,600 kwa wafugaji kutoka kaunti ya Kwale kwa gharama ya shilingi milioni 40 ili kuwapunguzia hasara wakulima kutokana na kiangazi kikali.

Wakati uo huo ameweka wazi kwamba Serikali inalenga kutoa msaada wa chakula kwa familia elfu 26 zilizoathirika na ukame katika kaunti ya Kwale na zitakuwa zikipokea shilingi elfu 3 kila mwezi ili kukidhi mahitaji yao hadi pale hali itakaporudi kuwa sawa.

             Story by Ephie Harusi –

Serikali ya kaunti ya Kilifi kupitia idara ya michezo imeahidi kuwekeza katika sekta ya michezo ili kuinua vipaji vya vijana katika kaunti hiyo.

Katibu wa michezo katika Wizara ya fedha kaunti ya Kilifi, Ben Kai amesema tayari mikakati ya kuboresha viwanja vya kaunti hiyo na muundo msingi inaendelea ili kuwawezesha vijana kuwa na viwanja vya kisasa.

Akizungumza katika eneo la Tezo baada ya kushuhudia mechi ya Jumhuri Cup, Kai amesema mikakati hiyo itachangia vijana wenye vipaji mbalimbali kutambulika na kujiimarisha kimaisha kupitia talanta zao.

Kwa upande wake Mwenyekiti wa Jamhuri Cup Israel Yeri, amesema japo baadhi ya vijana katika kaunti hiyo wamekosa kuboresha vipaji vyao kutokana na changamoto za viwanja ni lazima serikali ya kaunti ya Kilifi ilifikia swala hilo ili kukuza vipaji vya vijana kupitia Soka.

                 Story by Ephie Harusi –

Idara ya usalama kaunti ya Kilifi imewataka madereva wa magari ya uchukuzi wa umma, yale ya masafa marefu na kibinafsi kuwa makini zaidi barabarani ili kuepuka kushuhudiwa kwa ajali.

Kamishna wa kaunti ya Kilifi Kutswa Olaka amesema ongezeko la visa vya ajali ya barabarani imetokana na madereva kuendesha magari yao kwa mwendo wa kasi bila ya kuzingatia sheria za trafiki.

Olaka amesema maafisa wa trafiki katika kaunti ya Kilifi wataendeleza doria katika maeneo ya barabarani ili kuhakikisha wanaotumia barabara wanazingatia sheria za trafiki hasa msimu huu wa sherehe za krismas na mwaka mpya.

Hata hivyo amewataka wasimamizi wa Sacco za matatu katika kaunti hiyo kutowaajiri madereva wasio na maadili katika utendakazi wao, akidai kwamba wakati mwingi madereva hao huchangia kushuhudiwa kwa ajali za barabarani.

Kauli yake imejiri baada ya watu 6 kuaga dunia na wengine 25 kujeruhiwa vibaya katika ajali ya barabarni eneo la Roka kwenye barabara kuu ya Malindi-Kilifi siku ya Jumamosi.

  Story by Our Correspondents –

Zaidi ya familia 360,696 zilizoathirika na kiangazi kikali kote nchini zinatarajiwa kupokea shilingi elfu tatu kila mwezi ili kukidhi mahitaji yao hadi pale hali itakaporudi kuwa sawa.

Akizungumza na Wanahabari baada ya kuzindua rasmi mpango huo ambao unalenga kaunti 23 kote nchini, Waziri wa mipango maalum nchini Prof. Margaret Kobia amesema fedha hizo zitatumwa kwa wananchi hao kupitia njia ya Mpesa.

Waziri Kobia amedokeza kwamba tayari shilingi bilioni 6 zimetengwa kufanikisha mpango huo huku akiweka wazi kwamba zaidi ya mifugo elfu 76 watachukuliwa na serikali na kuchinjwa kisha kusambaziwa wakaazi walioathirika na ukame katika kaunti hizo 23.

Hatua hiyo imejiri baada ya serikali kutangaza kwamba ukame ni janga la kitaifa na linahitaji kushuhulikiwa kwa haraka ili kuzuia idadi kubwa ya wananchi kuathirika.

           Story by Our Correspondents –

Waziri wa usalama wa ndani Dkt Fred Matiang’i ametangaza rasmi kwamba siku ya Jumatatu ya tarehe 13 mwezi huu itakuwa siku ya kitaifa ya mapumziko kwani sherehe za Jumhuri za mwaka kuu zitaadhimisha siku ya Jumapili ya tarehe 12.

Katika tangazo hilo lililochapishwa rasmi katika gazeti la serikali Waziri Mataing’i amesema kulingana na sehemu ya pili na nne ya sheria za sherehe za kitaifa sawa na kifungu cha 110, siku ya Jumatatu itakuwa siku ya mapumziko.

Matiangi ameweka wazi kwa sherehe hizo zitaandaliwa katika bustani ya Uhuru jijini Nairobi na zitaongozwa na Rais Uhuru Kenyatta huku wakenya watakaojitokeza kuhudhuria sherehe hizo wakihimizwa kuzingatia kanuni za Covid-19.

Wakati uo huo amewahimiza wakenya kusheherekea sherehe za Jamhuri kwa kutambua umoja, mshikamano wa taifa na kujenga uchumi wa nchi kwani taifa litakuwa linaadhimisha miaka 58 ya uhuru.

             Story by Ephie Harusi –

Idadi kubwa ya wakaazi wa maeneo ya Milore katika eneo bunge la Ganze kaunti ya Kilifi wamenufaika na mradi wa mawasiliano baada ya Mamlaka ya Mawasiliano nchini CA kujenga mnara katika eneo hilo.

Katibu mkuu msimamizi katika Wizara ya Habari, mawasiliano na tekinolojia nchini Erick Kiraithe amesema mtandao huo utaboresha pakubwa maisha ya wakaazi wa eneo hilo.

Kiraithe amesema serikali itaendeleza mpango huo katika kaunti ya Kilifi ili kuhakikisha maeneo ya mashinani yanaboreshwa zaidi kimawasiliano na mradi huo hauhusika na maswala ya uchaguzi.

Hata hivyo wakaazi wa eneo hilo wakiongozwa na Hinzano Ponda wamesema mradi huo utaboresha zaidi mawasiliano katika maeneo ya mashinani pamoja na biashara zao kwani umetatua changamoto za mawasiliano.

Mradi huo uliofadhiliwa na hazina ya Universial Service fund unalenga pia kunufaisha maeneo ya Gede na Ndugumnani.

                   Story by Our Correspondents –

Tume huru ya uchaguzi na mipaka nchini IEBC imeweka wazi kwamba haina uwezo wa kuwazuia wanasiasa kutofanya kampeni za mapema bali watawahimiza kuhakikisha wanadumisha amani wakati wa kampeni zao. 

Mwenyekiti wa Tume hiyo Wafula Chebukati amesema Tume hiyo haina mamlaka ya kufanya hivyo bali wanasiasa wenyewe wanafaa kuzingatia amani na wala sio kuvuruga usalama wa taifa hili.

Katika kikao na viongozi wa baraza la makanisa nchini NCCK, Chebukati amewahimiza viongozi hao wa kidini kuwashauri wanasiasa kutambua umuhimu wa taifa lenye amani ili kuwepo na uchaguzi wa amani.

Wakati uo huo amewataka vijana kujitokeza kwa wingi wakati wa zoezi la usajili wapiga kura mwaka ujao ili waweze kushiriki kikamilifu katika uchaguzi mkuu ujao.