Monthly Archives: October 2021

          Story by Our Correspondents –

Kenya imepokea shehena nyingine ya chanjo ya Corona aina ya Pfizer yenye dosi 990,990 kutoka taifa la Marekeni ili kupiga jeki juhudi za kudhibiti maambukizi ya virusi vya Corona nchini.

Akizungumza na Wanahabari baada ya kupokea shehena hiyo ya Chanjo ya Corona katika uwanja wa ndege wa kimataifa wa Jomo Kenyatta jijini Nairobi, Katibu mkuu msimamizi katika Wizara ya Afya nchini Dkt Mercy Mwangangi amesema chanjo hiyo itasambazwa katika kaunti zote nchini.

Dkt Mwangangi amesema kufikia mwishoni mwa mwezi Disemba mwaka huu, Kenya itakuwa imepokea dozi milioni 5 ya chanjo ya Corona aina ya Moderna, Pfizer na Johnson na Johnson kutoka taifa la Marekani.

Wakati uo huo amesema kufikia siku ya Alhamis wakenya 5,226,128 tayari wamepokea chanjo ya Corona huku akiwahimiza wakenya kutopuuza chanjo hiyo na badala yake kujitokeza na kupokea chanjo.

Story by Charo Banda –

Hali ya sintofahamu imetanda katika shule ya upili ya Wavulana ya Malindi High kaunti ya Kilifi baada ya wazazi wa wanafunzi wa shule hiyo kupiga kambi katika lango kuu la shule hiyo wakitaka kujua hatma ya watoto wao baada ya bweni la shule hiyo kuchomeka.

Wakizungumza na Wanahabari, mmoja wa wazazi hao Kaingu Rembo amesema hawatabanduka katika lango la shule hiyo hadi pale watakapopewa fursa ya kuzungumza na watoto wao.

Naye Julia Ogona amesema licha ya kurauka katika shule hiyo baada ya bweni la shule hiyo kuchomeka usiku wa kuamkia leo hawajapewa nafasi ya kuwaona watoto wao.

Hata hivyo maafisa wa zima moto kutoka mjini Malindi walifika katika shule hiyo na kuuzima moto huo.

                   Story by Mwanamina Fakii –

Wanafunzi wa shule ya msingi ya Ng’odzini katika eneo bunge la Kinango kaunti ya Kwale wamenufaika na ufadhili wa mabweni mawili kutoka kwa Shirika la linaloangazia ufadhili wa wanyamapori la Born Free na Serikali ya Japan.

Akizungumza katika halfa ya kupokeza rasmi mabweni hayo usimamizi wa shule hiyo Meneja wa Shirika la Born Free Tim Oloo amesema Shirika hilo limekuwa likitoa ufadhili kwa jamii ambazo zinapatana na mbuga za wanyama ili kujenga uwezo.

Kwa upande wake Gavana wa Kwale Salim Mvurya amesema hatua hiyo itaboresha viwango wa masomo shuleni humo.

Mvurya hata hivyo ameipongeza serikali ya Japan kwa ufadhili huo wa mabweni hayo mawili, akisema ujenzi wa mabeni hayo umegharimu takriban shilingi milioni 14.

Halfa hiyo pia imehudhuriwa na Balozi wa Japan humu nchini Horie Ryoich pamoja na wadau wengine wa sekta ya elimu kaunti ya Kwale.

               Story by Charo Banda –

Kamati maalum ya kutatua mizozo ya ardhi katika eneo la Kadzuhoni kule Magarini kaunti ya Kilifi imebuniwa ili kutafuta suluhu la mzozo wa ardhi baina ya wenyeji na bwenyenye anayedai kuwa mmiliki ardhi hiyo.

Gavana wa Kilifi Amason Jefwa Kingi amesema kamati hiyo imebuniwa baada ya wakaazi wa eneo hilo kudai kuwa hawana imani na kamati ya awali ambayo imefeli kutatua swala hilo.

Gavana Kingi amesema kamati hiyo ya watu 15 inatarajiwa kufanya mazungumzo na bwenyenye huyo na kuafikiana maswala kadhaa yatakayohakikisha wakaazi hao wanapata uhalali wa ardhi hiyo yenye ekari 339.

Naye Mbunge wa Magarini Micheal Kingi amesisitiza haja ya kutoingizwa siasa katika swala hilo tata la ardhi huku akimtaka waziri wa ardhi katika kaunti hiyo kuhakikisha kamati hiyo inapata usaidizi ili kuibuka na suluhu la mzozo huo.

Kwa upande wake Waziri wa ardhi katika serikali ya kaunti ya Kilifi Maurine Mwangovya amesema zaidi ya familia elfu tatu katika ardhi hiyo zimeathirika na mzozo huo wa ardhi.

                   Story by Charo Banda –

Waziri wa maji na unyunyizaji mimea Bi Sicily Kariuki amesema serikali ina mipango ya kufufua upya mradi wa Galana Kulalu ili kuhakikisha unazalisha chakula kwa wingi.

Akizungumza na Wanahabari baada ya kuzuru katika mradi huo, Sicily amesema serikali imeweka mikakati ya kuhakikisha mradi huo wa kilimo nyunyizi wa takriban ekari elfu 540 unaongezwa hadi ekari milioni moja.

Sicily amesema mpango wa unyunyizaji maji mashamba utasaidia pakubwa mradi huo kuzalisha chakula kwa wingi ili kukabiliana na ukame na baa la njaa linaloendelea kushuhudiwa nchini.

Wakati uo huo amedokeza kuwa serikali ina mipango ya kuhakikisha mradi huo unakabidhiwa muekezaji wa kibinafsi ili kufanikisha malengo ya serikali ya kuzalisha chakula.

              Story by Bakari Ali –

Wakaazi wa eneo la Barawa-Utange eneo bunge la Kisauni kaunti ya Mombasa wameitaka serikali ya kitaifa na ile ya Mombasa kuingilia kati mzozo wa ardhi ya ekari 3 unaoendelea baina yao na bwenyenye mmoja.

Wakizungumza na Wanahabari baada ya ubomozi wa nyumba zao uliyotekelezwa na watu wasiojulikana waliokuwa wameandamana na maafisa wa usalama wakaazi hao wamesema ni sharti serikali hizo mbili kuibuka na suluhu. 

Kwa upande wake Mbunge wa Kisauni Ali Mbogo amesema wakaazi wa eneo hilo hawatabanduka katika kipande hicho cha ardhi na kuitaka serikali kuangazia suala hilo kwa haki na usawa.

Wakati uo huo Mwanaharakati wa kisiasa katika kaunti hiyo Shafi Makazi amewakashfu viongozi wa kaunti ya Mombasa kwa kutozingatia maslahi ya mwananchi.

                  Story by Our Correspondents –

Mali ya thamani isiojulikana imeteketea baada ya bweni la shule ya upili ya Golini eneo la Matuga kaunti ya Kwale kushika moto.

Kulingana na walioshuhudia mkasa huo, huenda moto huo umesababishwa na hitilafu za nguvu za umme japo juhudi za wakaazi kuuzima moto huo hazikufaulu kwani wazima moto kutoka kaunti ya Kwale walifika kuchelewa katika eneo la tukio.

Afisa wa polisi anayesimamia kituo cha polisi cha Kwale Phillip Ngatia amethibitisha kutokea kwa mkasa huo na kudai kwamba tayari uchunguzi umeanzishwa japo hakuna mwanafunzi yeyote aliyejeruhiwa.

Wakati uo huo bweni la shule ya upili Dkt Kraft katika eneo la Rabai kaunti ya Kilifi limeteketea baada ya kutokea hitilafu za nguvu za umme.

             Story by Mimuh Mohamed –

Tume huru ya uchaguzi na mipaka nchini IEBC imekutana na maafisa wa vitengo mbali mbali vya serikali ikiwemo wa idara ya mahakama, usalama na wadau wengine husika kujadili mikakati kuhusu maandalizi ya uchaguzi mkuu ujao.

Akizungumza na wanahabari baada ya kukamilika kikao hicho cha faragha, Jaji mkuu nchini Martha Koome amesema maafisa wa vitengo hivyo watakutana mara kwa mara kutathmini utayari wa vitengo hivyo na kusimamia uchaguzi huru na haki.

Bi Koome aidha amesema idara ya mahakama iko tayari kushuhulikia kesi zote zitakazowasilishwa mahakamani kuhusiana na uchaguzi ujao,akitoa muda wa siku 90 kwa maafisa wa idara ya mahakama kusikiza na kuamua kesi zote za uchaguzi zilizowasilishwa awali na ambazo hadi sasa hazijashughulikiwa.

Kwa upande wake Mwenyekiti wa IEBC Wafula Chebukati amesema tangu kuanza kwa zoezi la usajili wa wapiga kura kufikia sasa  tume hiyo imefanikiwa kusajili takriban wapiga kura elfu 760, akitoa hakikisha kwamba tume hiyo itazidisha ushirikiano na vitengo muhimu vya serikali kuhakikisha wanaandaa uchaguzi huru na haki.

Naye Waziri wa usalama wa ndani Dkt Fred Matiang’i amesema idara ya usalama itashirikiana kikamilifu na IEBC kufanikisha uchaguzi wa amani huku akisema wataongeza maafisa wa polisi watakaosimamia uchaguzi ujao.

              Story by Mwanaisha Soza-

Mshukiwa wa kesi ya unajisi Suleiman Musa Kambirwa amehukumiwa kifungo cha miaka 15 gerezani baada ya uchunguzi wa kesi hiyo kubainika wazi kwamba alitekeleza kitendo hicho. 

Hakimu mkuu wa Mahakama ya Kwale Joe Omido ameagiza mshukiwa huyo kutumikia kifungo chake katika gereza la Shimo la Tewa katika kaunti ya Mombasa.

Awali kabla ya hukumu hiyo kutolewa, mshukiwa alikana shtaka hilo mbele ya Hakimu Christine Auka kabla ya kesi hiyo kuhamishiwa Hakimu mkuu wa Mahakama hiyo Joe Omido.

Mahakama iliarifiwa kwamba mshukiwa alitekeleza kitendo hicho mnamo tarehe 12 mwezi Mei mwaka wa 2019 katika kijiji cha Malalani eneo la Diani kaunti ya Kwale kwa mtoto wa miaka 3 baada ya kumshurutisha amnyonye sehemu nyeti.

Hata hivyo mshukiwa na hadi siku 14 za kukata rufaa iwapo hajaridhishwa na uamuzi huo wa Mahakama.

              Story by Charo Banda –

Mahakama kuu ya Malindi ameagiza kuzuiliwa rumande kwa washukiwa watatu wa mauaji ya mfanyibiashara maarufu mjini Malindi Mohammed Nassir Juma hadi Oktoba 28 mwaka huu ambapo watatu hao watafikishwa tena Mahakamani.

Jaji wa Mahakama hiyo Stephen Githinji ametoa agizo hilo na kusisitiza watatu hao kuzuiliwa katika kituo cha polisi cha Malindi baada ya upande wa mashtaka kuiomba Mahakama hiyo kuipa mda wa juma moja kukamilisha uchunguzi wao.

Jaji Githinji amewaagiza pia maafisa wa usalama kuwapa ulinzi wa kutosha mashahidi kwenye kesi hiyo ili kuzuia washukiwa kuhitilafiana na kesi hiyo.

Awali kabla ya agizo hilo, Mahakama iliarifiwa kwamba watatu hao akiwemo Nelson Wanje Mugaya, Henry Wanje Karani, na Amos Kiponda Charo walitekeleza kitendo hicho cha kinyama mnamo tarehe 12 mwezi Agosti mwaka huu katika kijiji cha Kolonje eneo la Jilore katika kaunti ndogo ya Malindi.