Monthly Archives: September 2021

                  Story by Ali Chete –

Familia mbili kutoka kaunti ya Mombasa zinalilia haki baada ya jamaa wao kupotea katika hali tatanishi takriban miezi miwili na kujulikana waliko.

Familia ya Abshir Garo Ali na Jackson Njue zimesema wawili hao walitoweka mnamo tarehe 24 mwezi Julai hadi sasa hawajulikani waliko licha ya juhudi za familia hizo kuwatafuta.

Kulingana na Dhahabu Hasasan ambaye ni mamake Abshir Garo, watu waliojitambulisha kama maafisa wa polisi walimchukua wanawe na kumpiga mbele yake huku wakidai kwamba wanampeleka katika kituo cha polisi Central jijini Nairobi.

Kwa upande wake Charles Njue ambaye ni kakaye Jackson Njue aliyetekwa nyara katika eneo la Diani kaunti ya Kwale tarehe sawa na ile yaliotekwa Abshir amesema kakake hajawahi kujihusisha maswala ya uhalifu.

Akizungumzia swala hilo Naibu mkurugenzi wa Shirika la Haki Africa Salma Hemed amesema visa vya watu kupotezwa katika hali tatanishi vimekithiri mno, huku akidai kuwa kati ya mwezi Januari hadi sasa wamenakili visa 34.

           Story Gabriel Mwaganjoni –

Mwakilishi wa kike kaunti ya Lamu Ruweida Obo amewahakikishia wavuvi walioathirika na mradi wa LAPSET katika kaunti hiyo kwamba watafidiwa.

Ruweida amesema amewasilisha swala hilo katika Wizara ya uchukuzi nchini inayosimamia mradi huo wa LAPSET na ambao ndio chanzo cha wavuvi hao kutimuliwa kwenye maeneo yao ya uvuvi ili kutoa nafasi ya ujenzi wa mradi huo.

Akizungumza Kisiwani Amu, Ruweida ameikosoa Serikali kwa kuwabagua wavuvi katika swala la fidia, licha ya wao kuwachwa katika hali ya umaskini baada ya shughuli zao za uvuvi kusharibiwa na mradi huo wa bandari ya Lamu.

Ruweida amesema atafanya kila juhudi ili kuhakikisha wavuvi hao wamelipwa fidia kwani wavuvi hao wamekuwa wakidai fidia yao ya shilingi bilioni 1.7 yapata miaka 9 sasa baada ya wao kufurushwa kwenye maeneo yao ya uvuvi.

                   Story by Gabriel Mwaganjoni

Utata umeikumba tena familia moja katika eneo la Mtwapa kaunti ya Kilifi kufuatia malumbano ya ni nani atakayeishi na mtoto wao wa miaka 3.

Mgogoro huo umefika katika Shirika la utetezi wa haki za kibinadamu la  MUHURI na kuchangia Afisa wa maswala ya dharura katika shirika hilo Francis Auma kufika mahakamani kutafuta mwafaka kuhusiana na swala hilo.

Auma amesema Mamake mtoto huyo Hellen Maria ambaye alizaa na raia mmoja wa Uingereza Kevin Burry kwa sasa hajui mwanawe aliko na amekuwa akihangaika kimawazo.

Kwa upande wake Maria aliyekuwa akizungumza nje ya majengo ya mahakama ya Mombasa alipopata kibali cha kuishi na mwanawe siku 4 huku Burry akiruhusiwa na mahakama kuishi na mwanawe siku tatu ndani ya juma moja amesema mahakama imemhangaisha mno.

               Story by Bakari Ali –

Mbunge wa Kisauni Ali Mbogo amewataka viongozi katika kaunti ya Mombasa kuweka mikakati mwafaka ya kutatua mizozo ya ardhi inayowakumba wakaazi wa kaunti hiyo.

Akizungumza katika eneo bunge lake, Mbogo amesema uongozi wa kaunti hiyo unapaswa kuweka mikakati bora ili wakaazi waishi katika ardhi zao bila ya usumbufu.

Mbogo amesema serikali kuu kupitia kamati ya ardhi katika bunge la kitaifa imetenga takriban shilingi milioni 300 kununua kipande cha ardhi cha Junda ili wakaazi hao wagawiwe ardhi hiyo.

Wakati uo huo amewataka wakaazi wa kaunti hiyo kuzingatia kwa kina sheria za umiliki wa ardhi ili kuepuka mizozo ya ardhi inayoshuhudiwa kila mara katika sehemu tofauti za kaunti hiyo.

                Story by Our Correspondents –

Rais Uhuru Kenyatta amefanya mabadiliko kadhaa katika baadhi ya mawaziri na makatibu nchini ili kuhakikisha wanawajibikia majukumu yao vyema katika kuwahudumia wananchi wote.

Akitangaza mabadiliko hayo, Msemaji wa Ikulu ya Rais Kanze Dena Mararo amesema Waziri wa Ugatuzi nchini Eugine Wamalwa amehamishiwa Wizara ya Ulinzi ili kushikilia nafasi ya Balozi Monica Juma aliyehamishwa Wizara ya Kawi.

Waziri wa Kawi nchini Charles Keter amehamishiwa Wizara ya Ugatuzi nchini huku Waziri wa Jinsia na huduma za umma Margaret Kobia akiongezewa majukumu zaidi na kuwa Waziri wa huduma za umma, jinsia, maswala ya kijamii na mipango maalum.

Hata hivyo Meja mstaafu Gordon Kihalangwa atakuwa Katibu katika Wizara ya Kawi, Mhandisi Dkt Joseph Njoroge atakuwa Katibu katika idara ya uchukuzi, Solomon Kitugo atakuwa Katibu katika idara ya ujenzi wa umma na Nelson Marwa akiwa Katibu katika idara ya ulinzi maalum, maswala ya kijamii na mipango maalum.

Hata hivyo Bi Kanze amesema ofisi ya Rais imechukua uamuzi wa kufanya mabadiliko hayo kwa kuzingatia kipengele cha 155 sehemu ya 5{a} na sehemu ya 4 ya Katiba ya nchi na kutekeleza mabadiliko hayo ambayo yameanza mara moja.

            Story by Bakari Ali –

Wanaharakati wa kijamii katika kaunti ya Kilifi wamewaonya wanasiasa wa Kike dhidi ya kuendeleza siasa za chuki na za uchochezi.

Wakiongozwa na Mkurugenzi wa Shirika la Kilifi Mums Kibibi Ali, Wanaharakati hao wamesema hawatawaruhusu wanasiasa wa Kike katika kaunti hiyo kuendeleza siasa potofu miongoni mwa jamii.

Kibibi ameitaka serikali kuweka mikakati mwafaka ya kuwahamasisha wanawake kuhusu muongozo wa Katiba, akisema hatua hiyo itahakikisha wanawake wanafahamu haki zao.

Kwa upande wake, mkurugenzi wa shirika la Kilifi Social Justice Samuel Kazungu amesema mashirika ya kutetea haki za kibinadamu katika kaunti ya Kilifi yatashirikiana na wagombania mbalimbali wa Kike ili kuibuka na suluhu la matatizo wanayoyakumba.

              Story by Our Correspondents –

Aliyekuwa Afisa mkuu mtendaji wa Tume huru ya uchaguzi na mipaka nchini IEBC Ezra Chiloba ameteuliwa kuwa mkurugenzi mkuu wa Mamlaka ya mawasiliano nchini CA.

Katika taarifa iliyotumwa kwa vyombo vya habari, Mwenyekiti wa Bodi ya Mamlaka hiyo Kembi Gitura amesema Chiloba atashikilia nafasi hiyo kwa kipindi cha miaka minne.

Taarifa hiyo imesema uteuzi wa Chiloba umejiri baada ya aliyekuwa mkurungezi mkuu wa Mamlaka hiyo Francis Wangusi kustaafu na nafasi hiyo kusalia wazi kwa mda.

           Story by Bakari Ali –

Wakaazi wa kaunti ya Kilifi wametahadharishwa dhidi ya kushawishiwa kifedha na wanasiasa wakati taifa linapokaribia uchaguzi wa mwaka 2022.

Mkurugenzi mkuu wa shirika la Kilifi Mums Kibibi Ali amesema huu ni wakati mwafaka wa jamii kuhamasishwa kuhusu jinsi ya kuwachagua viongozi kwa kuzingatia uadilifu na maendeleo.

Kibibi amewataka viongozi wa kike walio na nia ya kuwania nyadhfa mbalimbali za uongozi nchini kuzikabili changamoto wanazozikumba katika harakati zao za kutafuta nyadhifa hizo

Kwa upande wake Balozi Sophy Kombe amesema wanawake wana uwezo wa kuongoza katika nyadhifa mbalimbali za uongozi iwapo watajitokeze kuwania nyadhfa hizo.

             Story by BakarI Ali –

Wanawake nchini wameshauriwa kuungana na kupiginia viti mbalimbali vya kisiasa bila ya kushurutishwa na wanasiasa wa kiume wakati taifa linapokaribia uchaguzi mkuu wa mwaka 2022.

Naibu Mkurugenzi wa shirika la utetezi wa haki za kibinadamu la Haki Africa Salma Hemed amesema ni sharti wanawake wawe na misimamo dhabiti ili kuepuka kutumiwa vibaya kisiasa.

Akizungumza katika kaunti ya Kilifi, Salma ameitaka idara ya usalama, wanaharakati na wadau mbalimbali katika kaunti ya Kilifi kushirikiana ipasavyo na kutatua mizozo ya ukiukaji wa haki za kibinadamu.

Wakati uo huo, amewataka wanawake kuisoma na kuielewa kwa kina katiba ya nchi ili waweze kutambua haki zao za kimsingi.

            Story by Our Correspondents –

Kinara wa chama cha ODM Raila Odinga amefanya mkutano na wafanyibiashara pamoja na viongozi kutoka mlima Kenya kujadili mikakati ya kufanikisha siasa za mwaka wa 2022.

Katika mkutano huo uliondaliwa jijini Nairobi, Odinga amesema mikakati ya kuinua uchumi wa nchi, uwekezaji na kufanikisha biashara huru ni kati ya mikakati itakayopewa kipau mbele baada ya kuunda serikali

Odinga ameweka wazi kwamba mikakati ya kukabiliana na janga la ukame nchini inafaa kufanikishwa hasa kwa kuhakikisha jamii inavuna maji ya mvua, akisema hatua hiyo ndio itasaidia wananchi kuwa na maji ya kutosha wakati wa kiangazi.

Akigusia swala la usalama wa taifa, Odinga amesema serikali inafaa kutoa ulinzi wa hali ya juu kwa kila mkenya, huku akidai kuwa hatua hiyo itachangia kuimariika kwa uchumi na maendeleo.

Wakati uo huo amesema huu ni wakati mwafaka wa kuwajenga uwezo wanawake ili kuchangia katika kukuwa kwa uchumi wa nchi, maendeleo na uwekezaji na akiishinikiza Tume huru ya uchaguzi na mipaka nchini IEBC kuwajibikia majukumu yake.