Monthly Archives: April 2021

Kampuni ya ndege ya Kenya Airways imesitisha safari za ndege zake za kwenda na kurudi katika jiji la Mumbai nchini India kufuatia ongekezo la maambukizi ya virusi vya Corona nchini India.

Katika taarifa kwa vyombo ya habari, Kampuni hiyo imesema imechukua hatua hiyo baada ya serikali kupiga marufuku ndege za India kuingia humu nchini kwa kipindi cha siku 14 ili kudhibiti msambao wa virusi vya Corona.

Taarifa hiyo imesema inazingatia agizo la serikali la kupambana na maambukizi ya virusi vya Corona huku ikiwaomba radhi abiria wake wanaolenga kusafari katika jiji hilo.

Hatua ya kampuni hiyo kusitisha safari za ndege zake kwa mda usiojulikana imetokana na baadhi ya mataifa ya Singapore, Bangladesh, Hongkong, na Uingereza kuungana na Kenya na kupiga marufuku safari za ndege kutoka nchini India.

Picha kwa hisani –

Maafisa wa polisi katika eneo la Likoni kaunti ya Mombasa wanawazuiliwa wanachama 11 wa kundi lililoharamisha la Mombasa Republican Council, MRC.

Afisa mkuu wa idara ya upelelezi katika gatuzi hilo dogo la Likoni Richard Koywer amesema 11 hao wameshikwa katika mtaa wa Maweni eneo la Likoni wakiendeleza mkutano wao kisiri bila hata ya kuzingatia masharti ya kudhibiti virusi vya Corona.

Richard amehoji kuwa kundi hilo la MRC liliharamishwa na Mahakama ya Mombasa yapata miaka 8 iliyopita na idara ya usalama katika eneo hilo haiwezi kuruhusu vikao vya aina yoyote ile ya kundi hilo.

Amesema polisi katika oparesheni yao ya kiusalama mwendo wa saa saba mchana wa leo wamelinasa kundi hilo lililo na wanachama wa kati ya umri wa miaka 34 na 68 wote wakiwa na vitambulisho maalum vya kundi hilo la MRC.

Washukiwa wote watazidi kuzuiliwa katika kituo cha polisi cha Likoni wakisubiri kufikishwa Mahakamani siku ya Jumatatu juma lijalo.

Wanawake wafuasi wa dini ya Kiislamu wametakiwa kutosalia nyuma na kujitokeza kupigania nafasi mbalimbali za uongozi ikiwemo katika mahakama za Kadhi nchini.

Mwanaharakati wa kijamii kaunti ya Mombasa Mesaidi Omar amesema wanawake wa jamii hiyo hawastahili kusalia nyuma bali kuziwania nyadhfa mbalimbali za uongozi.

Akizungumza katika kaunti ya Mombasao, Msimamizi huyo mkuu wa miradi katika Shirika la Haki Afrika amesema uteuzi wa Jaji mkuu nchini Martha Koome ni ishara kamili kwamba wanawake wana uwezo wa kuongoza nchi.

Hata hivyo amesisitiza kwamba ni sharti mswada wa thuluthi mbili ya usawa wa kijinsia upitishwe bungeni na kuwa sheria ili kutoa nafasi kwa wanawake katika uongozi.

Picha kwa hisani –

Mahakama kuu ya Garsen imemuachilia kwa dhamana ya shilingi nusu milioni ama pesa taslimu shilingi laki tatu, Mwakilishi wa Wadi ya Mkomani kaunti ya Lamu Yahya Ahmed Shee baada ya kukata rufaa dhidi ya kesi iliokuwa ikimkabili.

Jaji wa Mahakama ya Garsen Reuben Nyakundi ametoa uamuzi huo baada ya Shee anayefahamika kwa jina maarufu Basode akiwa tayari amehudumu gerezani kwa majuma matatu baada ya kupewa kifungo cha miaka 5 na Mahakama ya Lamu

Hii ni baada ya Mahakama ya Lamu kumpata na hatia Basode ya kujaribu kumtorosha mlanguzi wa dawa za kulevya aliyekuwa amehukumiwa na Mahakama ya Lamu kifungo cha miaka 20 gerezani, tukio lililofanyika tarehe 2 ya mwezi Juni mwaka wa 2017.

Wafuasi wa Kiongozi huyo wameandamana wakifurahia hatua hiyo huku wakidai kuwa Basode anapigwa vita kisiasa na wapinzake wake akiwemo Gavana wa Lamu Fahim Twaha kutokana na uwajibikaji wake katika bunge la kaunti ya Lamu.

Picha kwa Hisani –

Tangu eneo la Pwani lipokee jumla ya kadi elfu 150 za huduma namba, idara ya usajili wa watu katika eneo la Pwani imekuwa ikijizatiti kuwawezesha wananchi kuzichukua kadi hizo.

Msajili mkuu wa watu katika eneo la Pwani Aggrey Masai amewarai wakaazi waliopata ujumbe mfupi kwenye simu zao za rununu kuhusu kadi hizo kujitokeza na kuzichukua.

Akizungumza alipokagua zoezi la kutoa kadi hizo katika jumba la Posta Kisiwani Mombasa, Masai amesema wakaazi wanajitokeza kwa mwendo wa kinyonga kuzichukua kadi hizo.

Wakati uo huo, amefichua kuwa imewalazimu Maafisa wa Idara hiyo kuzuru mashinani ili kuwafikishia wananchi wenyewe kadi zao.

Picha kwa Hisani –

Serikali imepiga marufuku ndege zote za abiria kutoka taifa la India kuingia humu nchini kwa kipindi cha siku 14.

Waziri wa Afya nchini Mutahi Kagwe ametoa tangazo hilo, akisema litaanza kutekelezwa kikamilifu kuanzia siku ya Jumamosi baada ya kushuhudiwa ongezeko la kasi la maambukizi ya virusi vya Corona na vifo katika mataifa ya kusini mwa bara la Asia.

Waziri Kagwe amesema abiria wote watakaoingia humu nchini kabla ya siku ya Jumamosi watalazimika kufanyiwa vipimo vya lazima vya maambukizi ya virusi vya Corona sawia na kuweka karantini ya lazima ya siku 14.

Kenya imechukua hatua hiyo baada ya taifa la Uingereza, Ufaransa, Hong Kong, Bangladesh, Oman na Singapore kupiga marufuku ndege zote za abiria kutoka taifa la India kuingia katika mataifa hayo.

Bunge la kaunti ya Tana River limemtimua Mamlakani Spika wa bunge hilo Michael Justine Nkaduda.

Katika hoja iliyowasilishwa bungeni humo na Mwakilishi wa Wadi ya Mikinduni Mohammed Buya, Wawakilishi Wadi wote 20 wameipitisha hoja hiyo bila kupingwa wakimkosoa Nkaduda kwa kulumbana na Gavana wa kaunti hiyo Meja Mstaafu Dhadho Godhana.

Buya amesema tangu mwaka wa 2017 alipoingia mamlakani, Nkaduda amedidimiza maendeleo ya kaunti hiyo kwa kukosa kushirikiana na bunge hilo wala Gavana wa kaunti hiyo katika kuangazia maswala ya maendeleo.

Kauli ya Buya imeungwa mkono na Kiongozi wa wachache katika bunge hilo Abdi Argamso anayeshikilia kwamba Spika Nkaduda amekuwa akiendeleza kampeni za mwaka wa 2022 na kuyaweka kando majukumu yake.

Kwa sasa, kamati ya wajumbe watano itateuliwa ili kumsikiliza Nkaduda kuhusu lawama za utepetevu na ubinafsi anazolimbikiziwa na wajumbe hao na kisha baadaye hoja hiyo kurudi tena bungeni na endapo itaidhinishwa na bunge hilo basi moja kwa moja Nkaduda itakuwa imetimuliwa.

Waziri wa Afya nchini Mutahi Kagwe amefanya ziara ya kiafya katika hospitali za kaunti ya Taita Taveta kukagua mikakati ilioidhinishwa na serikali ya kaunti hiyo kudhibiti msambao wa virusi vya Corona.

Waziri Kagwe amesema zoezi la kuwachanja wakenya chanjo ya kuzuia maambukizi ya virusi vya Corona linaendelea vyema japo idadi ya wakenya wanaojitokeza kupokea chanjo hiyo imeanza kushuka.

Akizungumza katika eneo la Mwatate kaunti ya Taita taveta, Waziri Kagwe amesema kufikia sasa Kenya imewachanja watu 853,081 huku watu wa umri wa miaka 58 na zaidi wakiandikisha idadi ya watu 494,278.

Hata hivyo amesema juhudi zinazoendelezwa na serikali ya kaunti ya Taita taveta za kupambana na maambukizi ya Corona ni za kuridhisha huku akiwahimiza wakenya kutopuuza masharti ya kujikinga na Corona.

Wakati uo huo Wizara ya Afya nchini imethibitisha kwamba watu 834 wamepata maambukizi ya virusi vya Corona katika mda wa saa 24 baada ya sampuli 8,498 kufanyiwa uchunguzi na idadi hiyo kufikia watu 158,326 huku watu 579 wakithibitishwa kupona virusi hivyo na watu 23 wakiaga dunia.

Jopo la watu 7 walioteuliwa na Rais Uhuru Kenyatta kuwapiga msasa wakenya waliotuma maombi ya kujaza nafasi za Makamishna wanne wa Tume ya huru ya uchaguzi na mipakani nchini IEBC wamekula kiapo.

Watu hao 7 ni pamoja na Gideon Solonka, Dkt Elizabeth Muli, Awori James Achoka, Elizabeth Odundo Meyo, Kasisi Joseph Ngumbi na Dkt Faradim Suleiman Abdullah.

Hata hivyo Dorothy Kimengech ambaye ni mtu wa 7 katika jopo hilo amekosa kufika katika majengo ya Mahakama ya Upeo kula kiapa na idadi hiyo kusalia watu 6 ambao wanatarajiwa kuanza vikao vya kuwapiga msasa watu wanaotaka kujaza nafasi za makamishna wanne wa IEBC waliojiuzulu.

Akizungumza baada ya kushuhudia jopo hilo likila kiapo, Naibu Jaji mkuu nchini  Philomena Mwilu amewashauri watu hao kuhakikisha wanatekeleza majukumu yao kwa uwazi na kuwateua makamishna watakaosimamia uchaguzi mkuu kwa njia ya haki.

Shirika la Search for Common Groud chini ya ufadhili wa European Union limewahimiza wakaazi wa kaunti ya Kwale kuzingatia kikamilifu masharti ya kudhibiti maambukizi ya virusi vya Corona.

Akizungumza na Wanahabari baada ya kutoa ufadhili wa vifaa vya kudhibiti Corona ikiwemo barakoa, viezi na mitungi ya maji kwa wananchi, maafisa wa usalama na wafanyibiashara, Afisa wa miradi katika shirika hilo Zena Hassan amesema hatua hiyo itadhibiti maambukizi.

Zena amesema kupitia mradi wa pamoja dhidi ya Corona, wanalenga kuwakidhi wakaazi walio katika athari zaidi ya kupata maambukizi hasa katika kaunti sita ikiwemo za Pwani na Nairobi.

Wakati uo huo ameweka wazi kwamba malengo ya shirika hilo ni kuhakikisha wananchi na maafisa wa usalama wanashirikiana katika kujanga uwiano wa kijamii ili kufanikisha vita dhidi ya Corona na kuimarisha usalama. 

Kwa upande wake Kamishna wa kaunti ya Kwale Joseph Kanyiri amesema vifaa hivyo vitasaidia pakubwa kudhibiti maambukizi ya virusi vya Corona huku akiwahimiza wananchi kuhakikisha wanajikinga kikamilifu.