Monthly Archives: December 2020

Picha kwa hisani –

Wasimamazi wa shule za msingi kote nchini, wamejitokeza na kudai kuwa shule bado zinakabiliwa na changamoto ya kudhibiti maambukizi ya virusi vya Corona kutokana na baadhi ya shule kukosa kuafikia hatua ya maandalizi.

Wakiongozwa na Mwenyekiti wa Chama cha Walimu wakuu wa shule za msingi nchini Nicholas Gathemia, wamesema shule zinahitaji angalau mara mbili ya nafasi ilioko shuleni ili kuhakikisha usalama wa wanafunzi shuleni dhidi ya Covid-19.

Gathemia amesema zaidi ya wanafunzi milioni 16 wa shule za msingi na upili wanatarajia kurudi shuleni Januari 4, huku shule nyingi zikionekana kukosa kufanya maandalizi yoyote.

Gathemia ameyasema hayo baada ya Kongamano la walimu wakuu wa shule za msingi kule Nairobi, huku akidai kuwa itakuwa changamoto kwa walimu shuleni kudhibiti maambukizi hayo.

Hata hivyo mapema leo, Waziri wa Elimu nchini Profesa George Magoha katika ziara yake ya kielimu kule kaunti ya Muranga, amesema serikali itasambaza shilingi bilioni 19 kwa shule za msingi na upili za umma kabla ya tarehe 4 Januari.

Picha kwa hisani –

Shirika la utetezi wa haki za kibinadamu litawasilisha ripoti rasmi kuhusu dhuluma dhidi ya binadamu kwa umoja wa mataifa ya Afrika ili kutafuta haki za waliodhulumiwa.

Afisa wa maswala ya dharura katika shirika hilo Francis Auma amesema kwa mwaka mzima sasa Shirika hilo limekuwa likikusanya ripoti za ukiukaji wa haki za kibinadamu katika Kaunti zote sita za Ukanda wa Pwani.

Kulingana na Auma, Kaunti za Kwale, Mombasa, Kilifi na Lamu zimeangaziwa zaidi huku dhuluma zinazotokana na vita dhidi ya ugaidi na mauaji ya kiholela miongoni mwa Wakaazi wa Ukanda wa Pwani zikijitokeza kwa wingi.

Auma amesema kwa sasa Watetezi hao wa haki za kibinadamu wako mashinani katika Kaunti ya Lamu wakiangazia swala hilo la ukiukaji wa haki za kibinadamu na kuapa kutumia mbinu zote ili kukomesha hali hiyo.

Picha kwa Hisani –

Tume huru ya uchaguzi na mipaka nchini IEBC ikiongozwa na mwenyekiti wake Wafula Chebukati imezindua rasmi zoezi la kukagua saini milioni nne zilizokusanywa ili kuidhinisha ripoti ya BBI.

Akizungumza wakati wa kuzindua zoezi hilo katika ukumbi wa BOMAS jijini Nairobi,Chebukati amesema kati ya watu waliotuma maombi kufanya kazi hio ni watu 400 pekee waliopewa nafasi hio baada ya kufanyiwa ukaguzi unaostahili.

Chebukati amewataka maafisa hao kuendeleza zoezi hilo la kukagua saini za BBI kwa kuzingatia sheria za tume hio ya IEBC ikizingatiwa kwamba tayari wamekula kiapo ili kuendeleza zoezi hilo.

Chebukati aidha amewataka maafisa hao waliopewa jukumu la kukagua siani za ripoti za BBI kuendeleza kazi hio kwa kuzingatia sheria za kuzia maambukizi ya virusi vya corona.

Itakumbukwa kwamba mnamo tarehe 10 mwezi huu wa disemba,jopo la BBI liliwasilisha saini 4.4 kwa tume ya IEBC,ambapo BBI inaitaji saini milioni 1 kabla ya kuidhinishwa na kuwasilisha katika mabunge ya kaunti kujadiliwa.

Picha kwa hisani –

Himizo zimezidi kutolewa kwa wazazi wa kaunti ya kwale kujitahidi kuhakikisha watoto wao wanarejea shuleni ifikapo januari mwaka ujao, ili kuendelea na masomo yao pasi na changamoto.

Mkurugenzi wa shirika la kielimu kaunti hiyo la KWEA Bi Sabina Saiti, amesema licha ya kuwa watoto wengi wamepitia changamoto nyingi ikiwemo kupachikwa ujauzito katika kipindi hiki cha likizo ndefu iliyo sababishwa na janga la korona wanahaki ya kurudi shuleni ili kutimiza ndoto zao maishani.

Wakati uo huo bi Sabina amewataka wazazi kuweza kuishinikiza serikali kuu kuajiri maafisa wa kutoa ushauri nasaha mashuleni akisema watoto wengi hasa waliopitia dhulma mbalimbali wameathirika kisaikolojia .

Ameitaja hali hiyo kama itakayosababisha changamoto kwa watoto hao kuweza kurudi katika hali zao za kawaida kimasomo.

Picha kwa hisani –

Waziri wa usalama wa ndani dkt Fred Matiang’i amewaagiza maafisa wa usalama walioko likizo msimu huu wa sherehe za mwisho wa mwaka kurejea kazini.

Akitoa tangazo hilo hapo jana baada ya kuzuru makao makuu ya maafisa wa kitengo cha RDU huko Embakasi,Matiangi amesema hatua hio inalenga kuhakikisha taifa lina usalama wa kutosha msimu huu wa sherehe.

Kwenye hotuba yake Matiangi vile vile amesema maafisa wa polisi wanaopiga doria msimu huu wa krismasi na mwaka mpya hawatowakabili wahalifu pekee,bali hata raia watakaovunja sheria za kuzuia kusambaa kwa virusi vya corona.

Matiangi ameapa kuzuru maeneo mbali mbali ya taifa msimu huu wa sherehe za mwisho wa mwaka ili kukagua hali ya usalama katika maeneo hayo,akiwasihi wakenya kuhakikisha wanazingatia sheria za nchi ili wasijipate pabaya.

Picha kwa hisani –

Waumini wa dini ya kikristo kote nchini wamejumuika katika maeneo tofauti ya ibada usiku wa kuamkia leo ,ibada ambazo zimekamilishwa kabla ya saa nne usiku kutokana na sheria ya kafyu iliowekwa na serikali.

Hata hivyo wafuasi wa dini ya Kikristo wametakiwa kuzingatia masharti ya kiafya ili kuzuia maambukizi ya virusi vya corona wakati huu wa shamra shamra za Krismasi na mwaka mpya.

Kamishna wa Kaunti ya Mombasa Gilbert Kitiyo amesema ni sharti Viongozi wa makanisa wawahimize waumini hao kuzingatia masharti hayo ili kuhakikisha waumini hao wanabaki salama.

Picha kwa hisani –

Mgomo wa madaktari umesitishwa hii leo  alasiri  baada ya mkutano kufanywa   baina ya  Wizara ya afya na viongozi wa chama cha madaktari nchini KMPDU.

Akizungumza na wanahabari  Waziri wa afya nchini  Mutahi  Kagwe amesema baada ya mazungumzo yaliyohusisha  viongozi  wa chama cha  madaktari nchini KMPDU na wizara hiyo madaktari walikubali kusitisha mgomo wao .

Waziri  Kagwe  ameeleza kuwa   Wizara ya  afya  imekubali  kutimiza matakwa ya madaktari  ambayo  ni  kuwapa marupurupu ya kazi pamoja na vifaa vya kuzuia msambao wa Corona ikwemo bima ya matibabu.

Aidha  mapema  wiki  hii  madaktari  waliungana na maafisa wa klinik pamoja na wauguzi kuendeleza  mgomo ili  kushinikiza  kulipwa marupupu ya mshahara ,  kupewa vifaa vya kuzuia Corona  pamoja na bima ya matibabu .

Picha kwa hisani –

Idara za usalama katika Kaunti za Kwale, Mombasa na Kilifi zimeungana ili kukabiliana na mchipuko wa kundi la ‘The Mombasa Republican Council’ (MRC ) katika Kaunti hizo tatu.

Kamishna wa Kaunti ya Mombasa Gilbert Kitiyo amesema kundi hilo limeonekana kuchipuka upya na kutishia usalama wa Ukanda mzima wa Pwani.

Kitiyo amesema Idara ya usalama katika Ukanda wa Pwani haiwezi kulegezea kamba kundi hilo kwani athari zake za kiusalama zinafahamika vyema,akisema Maafisa wa usalama wako macho na watakabiliana watakaojiunga na kundi hilo.

Kitiyo amewataka wakaazi wa eneo la Pwani kutowaficha wanachama wa kundi hilo na badala yake wawafichue kwa Maafisa wa usalama ili wakabiliwe kisheria akisema zaidi ya wanachama 80 wa kundi hilo la MRC tayari wamehukumiwa na kufungwa gerezani.

Picha kwa hisani –

Gavana wa Nyamira marehemu John Nyagarama anatarajiwa kuzikwa hii leo na tayari ibada ya mazishi inaendelea katika shule ya msingi ya Nyamira.

Viongozi mbali mbali akiwemo aliyekuwa waziri mkuu Raila Odinga,jaji mkuu David Maraga, mawaziri,magavan,wabunge ,wawakilishi wadi na viongozi wengine tayari wamewasili katika hafla hio ya mazishi inayoendelea kwa sasa katika kaunti ya Nyamira.

Viongozi waliohudhuria hafla hio kwa sasa wanaendelea kutoa hotuba zao

Mwendazake Nyagarama aliaga dunia wiki moja iliyopita akiwa na umri wa miaka 74 ,akiwa katika hospitali ya Nairobi ,baada ya kupata maambukizi ya virusi vya corona. 

Nyagarama ni gavana wa kwanza nchini kuaga dunia kutokana na maambukizi ya virusi vya corona.