Monthly Archives: July 2020

Picha kwa Hisani

Viongozi wa kidini, Maafisa wa idara ya Afya na wale wa kiusalama wamefanya mkutano wa kutathmini jinsi ya kuzuia maambukizi ya Corona kwenye nyumba za ibada  katika eneo la Changamwe kaunti ya Mombasa.

Wakiongozwa na Askofu wa Kanisa la ‘Jesus Winning Ministry’  Daniel Indatula, viongozi hao wamesema makanisa yamezingatia kikamilifu masharti yaliowekwa na Wizara ya Afya.

Kwa upande wake Chifu wa eneo la Chaani Ben Valasa Mutunga amesema baadhi ya masharti  hayajazingatiwa katika nyumba za ibada lakini mazungumzo hayo yatoa muelekeo juu ya suala hilo.

Mkutano huu umejiri baada ya taarifa za kukanganya kuenea kuwa kuna baadhi ya makanisa yamekuwa yakikiuka masharti yaliowekwa na Wizara ya Afya nchini ya kudhibiti maambukizi ya Corona.

Picha kwa Hisani

Kenya imeungana na mataifa mengine yaliowanachama wa umoja wa mataifa kuadhimisha siku ya kupambana na ugonjwa wa homa ya ini yaani hepatitis.

Katika ujumbe wake kuhusu maadhimisho ya mwaka huu shirika la afya duniani WHO limeyataka mataifa kuchukua hatua za dharura kuzuia maambukizi ya ugonjwa huo kutoka kwa mama hadi kwa mtoto,sawa na kuhakikisha wanaopata ugonjwa huo wanapata tiba.

WHO imesema aina za Hepatitis B na C ndio hatari zaidi na usababisha takriban asilimia 80 ya vifo vyote vya saratani ya ini na kuuwa watu milioni 1.4 kwa mwaka.

Shirika hilo limesema kipindi hiki cha janga la Corona ugonjwa huo wa homa ya ini yaani Hepatitis unasababisha vifo vya watu wengi kwa siku ulimwenguni.

Picha kwa Hisani

Gavana wa kaunti ya Tana river Meja mstaafu Dhadho Godhana ameitaka Serikali kuu kusambaza fedha kwa serikali za kaunti ili kuziwezesha kaunti kutekeleza majukumu yake ya kuwahudumia wakenya mashinani.

Godhana amesema kaunti ya Tana river haijapokea kima cha shilingi milioni 550 cha mwezi Juni hali inayoifanya Serikali ya kaunti hiyo kushindwa kuweka mipangilio inayostahili katika kuzuia virusi vya Corona.

Godhana amesema Serikali ya kaunti hiyo inakabiliwa na changamoto nyingi katika kulipa madeni yake kutokana na kucheleweshwa kwa fedha hizo, akiitaka Serikali kuu kuzituma fedha hizo mashinani.

Wakati uo huo, Godhana amepinga vikali mabadiliko katika mfumo wa ugavi wa fedha kwa serikali za kaunti ambao umezua malumbano makali katika bunge la Seneti.

Picha kwa Hisani

Wawakilishi wa wadi katika kaunti ya Nairobi, sasa wanatishia kumtimua mamlakani Gavana wa kaunti hiyo Mike Mbuvi Sonko kutokana na kushindwa kuwajibikia majukumu yake.

Wakiongozwa na Mwakilishi wa wadi ya Embakasi katika kaunti ya Nairobi Ogado Okumu, viongozi hao wamempaka Gavana Sonko makataa ya siku 14 kumteua Naibu Gavana wa kaunti hiyo la sivyo watamtimua uongozini.

Okumu amesema tabia ya Gavana Sonko kukosoa uongozi wa Nairobi Metropolitan chini ya Meja generali Mohamed Badi, ni kutafuta mbinu ya kuvuruga maendeleo ya kaunti ya Nairobi.

Wawakilishi hao wa wadi wamemtaka Rais Uhuru Kenyatta, Chama cha Jubilee na viongozi husika kuingilia kati swala hilo na kumteua Naibu Gavana wa Nairobi la sivyo watanzisha mchakato wa kumtia Gavana Sonko Mamlakani.

Picha kwa Hisani

Kinara wa chama cha ODM Raila Odinga sasa anawahimiza maseneta kupitisha mfumo wa ugavi wa fedha zinazotengewa serikali za kaunti na wala sio kubishana kila uchao.

Katika taarifa kwa vyombo vya habari baada ya kufanya kikao na viongozi wa serikali, Odinga amesema mvutano unaoendelea kwa sasa hauna manufaa yoyote kwa wakenya na ni wazi kuwa mvutano huo umechangiwa na siasa za ukabila.

Odinga amesema maswala yanayoibuliwa katika mfumo huo yanafaa kunakiliwa ili awamu ijayo ya ugavi wa pato la kitaifa yatazingatiwa kwa lengo la kuzuia kutokea tena kwa mvutano unashuhudiwa kwa sasa.

Wakati uo huo ametetea mfumo ambao unapendekezwa na Tume ya ugavi wa mapato nchini, akisema mfumo huo uliafikiwa baada ya mashauri ya kina yaliohusisha serikali ya kitaifa, serikali za kaunti na wataalam wa maswala ya fedha.

Hata hivyo Odinga amezihimiza serikali za kaunti kubuni mikakati ya kujipatia mapato zaidi kutokana na shughuli ambazo zinaendelea katika kaunti zao.

Picha kwa Hisani

Kinara wa chama cha ANC Musali Mudavadi amewataka maseneta wote kujitenga na malumbano ya kisiasa na badala yake kupigania maslahi ya wananchi kwa kuhakikisha kuna usawa katika ugavi wa fedha kwa serikali za kaunti.

Akizungumza hapo jana Mudavadi amesema mfumo wa ugavi wa mapato katika kaunti umewekwa wazi kwenye Katiba ya nchi na ni vyema iwapo vipengele vyote vinavyofungamana na ugavi wa mapato vitazingatiwa.

Mudavadi amesema mabishano yanayoendelezwa katika bunge la Seneti kuhusu ugavi wa mapato yanaathiri mchakato wa maendeleo nchini kwani usambazaji wa fedha kutoka serikali kuu hadi zile za kaunti unacheleweshwa.

Kiongozi huyo hata hivyo ametaka maafikiano ya haraka kufanyika katika bunge la Seneti ili kuhakikisha fedha za maendeleo zinasambazwa kwa serikali za kaunti.

Gavana wa kaunti ya Kwale Salim Mvurya amepinga vikali mfumo mpya wa ugavi wa mapato unaolengwa kutekelezwa kwa serikali za kaunti, akisema huenda ukaathiri pakubwa maendelea ya kaunti.

Gavana Mvurya amesema iwapo mfumo huo utaidhinishwa na bunge la seneti jinsi Tume ya ugavi wa mapato nchini inavyopendekeza basi kaunti ya Kwale itapoteza takribani shilingi bilioni 1.2.

Akizungumza na Wanahabari, Gavana Mvurya amedai kuwa hatua hiyo itaathiri pakubwa shughuli za maendeleo katika serikali za kaunti nchini.

Wakati huo uo Gavana Mvurya amewataka maseneta kuupanga mfumo huo bungeni kwani utahujumu shughuli nyingi za maendeleo mashanani na malengo ya Katiba ya nchi.

Mfumo huo mpya wa ugavi wa mapato kwa serikali za kaunti nchini umezua mdahalo huku Maseneti kutoka kanda ya Pwani wakishikilia kutounga mkono mfumo huo mpya kwani utalemeza juhudi za maendeleo mashinani.