Monthly Archives: May 2020

Akina mama katika eneo la Matuga kaunti ya Kwale wamehimizwa kutohofia lolote na badala yake kuwapeleka watoto wao hospitali ili kupata chanjo ya maradhi mbalimbali.

Afisa wa Afya katika kituo cha afya cha Chitsanze, Catherine Gacheria amesema chanjo ni kinga ya maradhi mbalimbali kwa watoto.

Kauli yake imejiri baada ya tetesi kuibuka kuwa kuna baadhi ya akina mama ambao wanahofia kuwapeleka watoto wao hospitalini kwa chanjo za maradhi mbalimbali, wakihofia kupata na virisi vya Corona.

Watu walio na akili tahira katika Kaunti ya Mombasa wako katika tishio kubwa kwenye suala la maambukizi ya virusi vya Corona miongoni mwa wakaazi wa Kaunti hiyo.

Mwenyekiti wa kundi la akina Mama la ‘Women Empowerment Network’ Bi Amina Abdallah amesema ni sharti watu hao wasiachwe nje katika mikakati ya kulikabili janga hilo.

Kulingana na Bi Abdallah, watu hao vile vile wanahitaji tiba na usaidizi maalum akihoji kwamba wanapitia hali ngumu hasa ukosefu wa chakula.

Bi Abdallah amesema kundi hilo la akina Mama linajizatiti ili kuwakimu wale watakaorudi hali yao ya kawaida baada ya matibabu na ushauri ili wajiunge tena na familia zao.

Zoezi la kuwapima Madereva wa masafa marefu virusi vya Corona mjini Voi na katika mpaka wa Kenya na Tanzania katika eneo la Taveta, litaanza rasmi baada ya kukamilika kwa mipangilio ya kulitekeleza zoezi hilo.

Gavana wa kaunti ya Taita Taveta Granton Samboja amelitaja zoezi hilo kama mwafaka katika jitihada za kukabiliana na virusi vya Corona katika kaunti hiyo.

Kulingana na Samboja, eneo la Voi limetumika na wahudumu wa magari ya masafa marefu, akionya kuwa iwapo Madereva hao hawatapimwa virusi hivyo basi wataiweka kaunti hiyo katika hatari.

Samboja amewataka wahudumu hao wa malori ya masafa marefu kutoghairi zoezi hilo, akisema sio tu kuwa lina umuhimu wa kuwalinda wakaazi wa kaunti ya Taita Taveta bali pia Madereva hao sawia na familia zao.

Idara ya usalama katika kaunti ya Mombasa ikishirikiana na Idara ya Afya katika kaunti hiyo inawasaka watu watano waliotoroka na familia zao baada ya kupimwa virusi vya Corona katika mtaa wa Old town na kupatikana wakiwa wameambukizwa.

Gavana wa Mombasa Ali Hassan Joho ameitaja tabia hiyo kama ya aibu, akisema watano hao watakaponaswa watatengwa na baadaye kufunguliwa mashtaka Mahakamani.

Joho amewahimiza wakaazi wa kaunti ya Mombasa kujitokeza na kupimwa kwa hiari ili kutoiweka kaunti hiyo katika hatari ya kusambaa kwa maambukizi ya Corona.

Kwa upande wa Idara ya Afya ya kaunti ya Mombasa, imeweka wazi kuwa japo kuna baadhi ya wakaazi wanaojitokeza kupimwa kwa hiari bado kuna changamoto ya kudhibiti maambukizi ya Corona.

PICHA KWA HISANI

Maafisa wa polisi Kisiwani Mombasa wameirisha doria katika eneo Old town ili kuhakikisha wakaazi wanazingatia amri ya kuingia au kutoka katika eneo hilo.

Afisa mkuu wa polisi anayesimamia kituo cha polisi cha Urban Eliud Monari amewaonya wakaazi wa eneo hilo dhidi ya kukiuka amri hiyo, akisema atakayenaswa atatiwa nguvuni na kuwekwa karantini kwa siku 14 kwa gharama yake mwenyewe.

Monari, amesema ni sharti amri hiyo izingatiwe kikamilifu na wakaazi kushirikiana na polisi ili kuhakikisha hakuna mvutano kati ya wakaazi  na maafisa wa usalama.

Hata hivyo shughuli nyingi za kibiashara katka eneo hilo zimesalia kufungwa huku Shirika la kupambana na uraibu wa dawa za kulevya la ‘Reachout Centre Trust’ likiwa miongoni mwa walioathirika baada ya kulazimika kufunga shughuli zao zote.

Kamati ya dharura ya kukabiliana na janga la Corona kaunti ya Kwale imewapa mamlaka zaidi mabalozi wa nyumba kumi ili kuhakikisha wanalinda mipaka ilioko katika maeneo yao.

Kamishna wa kaunti ya Kwale Karuku Ngumo amesema mabalozi wa nyumba kumi waliopewa jukumu hilo ni wale walioko katika maeneo ambayo hakuna maafisa wa polisi.

Ngumo amesema hatua hiyo itasaidia pakubwa kuhakikisha marufuku ya kuingia au kutoka katika kaunti hiyo inatekelezwa vilivyo ili kuzuia kusambaa kwa virusi vya corona.

Kamishna huyo wa kaunti ya Kwale amedokeza kuwa wakaazi wengi wa kaunti hiyo bado hawajazingatia agizo la kuvaa barakoa wanapokua katika maeneo ya umma.

Mwanamume mmoja ameaga dunia katika hali tata baada ya kuanguka ghafla barabarani kule Mombasa.

Afisa mkuu wa polisi anayesimamia kituo cha polisi cha Urban Eliud Monari amesema mwanamume mwenye umri wa miaka 70 ameanguka ghafla nje ya benki moja katika barabara ya Nkrumah na huenda alikuwa na matatizo ya kupumua.

Maafisa wa Afya na wale wa kiusalama walifika katika eneo la tukio wakiwa wamevalia magwanda ya kujikinga na virusi vya Corona na kuuchukua mwili wa jamaa huyo hadi katika hifadhi ya maiti ya hospitali kuu ya Ukanda wa Pwani.

Tukio hili limewatia hofu wafanyakazi wa benki hiyo sawia na wapita njia kutokana na kukithiri kwa maambukizi ya Corona kaunti ya Mombasa.

Baadhi ya wabunge katika kaunti ya Taita Taveta wametaka fedha zilizotengwa na serikali kwa ajali ya kuzikimu familia maskini wakati huu wa janga la Corona fedha hizo kusambazwa hadi mashinani.

Wakiongozwa na Mbunge wa Voi Johnes Mlolwa, wabunge hao wamesema janga la Corona limeathiri wananchi wengi kiuchumi ikiwemo wale wa kaunti ya Taita taveta.

Mlolwa ameitaka serikali ya kaunti hiyo kutenga sehemu maalum ya kuwapima watu virusi vya Corona mjini Voi kwani mji huo unapokea wageni wengi.

Wakati uo huo amewataka wakaazi wa kaunti hiyo kuzingatia masharti yote ya afya ili kujikinga na ugonjwa wa Corona.