Monthly Archives: April 2020

Takribani familia 60 kutoka eneo la Malindi na ambazo zinategemea uvunjaji wa kokoto ili kujikimu kimaisha zimepokea msaada wa chakula wakati huu ambao nchi inapambana na janga la Corona.

Akizungumza baada ya ugavi wa chakula hicho,Claudia Kenga kutoka shirika la pamoja – MITANAD kutoka Austria amesema kuwa familia hizo 60 zimenufaika na unga,maharagwe,mafuta na mchele.

Claudia aidha amesema kuwa lengo lao nikuhakikisha kuwa shirika hilo linasaidia serikali katika ugavi wa chakula katika jamii mbalimbali ambazo hazina uwezo.

Mshirikishi huyo aidha amesema kuwa tayari shirika hilo limesaidia takribani familia 155 ambazo zimeathirika hata zaidi tangu janga la Corona kuripotiwa humu nchini.

Familia elfu nane katika kaunti ya Kwale, zilizosambaratika kiuchumi kutokana na janga la Corona zitanufaika na chakula cha msaada katika awamu ya kwanza ya mradi huo.

Akizungumza wakati wa uzinduzi wa mpango huo Gavana wa Kwale Salim Mvurya amesema wanatarajia kupata msaada zaidi kutoka kwa wahisani na wakaazi zaidi watapata msaada huo.

Amesema msada huo utatolewa kwa wananchi kwa kuzingatia muongozo uliotolewa na serikali na kwamba suala la kudumisha umbali wa mita moja na zaidi utazingatiwa wakati wa zoezi hilo.

Kauli yake inajiri huku baadhi ya wakaazi wa kaunti hio wakilalamikia kubaguliwa katika mpango huo licha ya kuwa na uhitaji wa msaada.

Serikali imetakiwa kuwaangazia watu walio na akili taahira hasa katika kaunti ya Mombasa baada ya takwimu za watu hao kuongezeka kila uchao.

Mwanaharakati wa maswala ya akina mama kutoka Shirika la ‘Mombasa Women Empowerment Network’, Bi Amina Abdallah amesema Serikali imeangazia mipangilio ya virusi vya Corona, huku watu walio na akili taahira wakirandaranda ovyo barabarani.

Akizungumza katika kituo cha kuwatibu watu walio na maradhi ya akili cha Portreitz kule Changamwe, Bi Abdallah amesema tayari ana mipango ya kuwanasa wagonjwa wengine wa maradhi hayo zaidi ya 100 ili watibiwe.

Wakati uo huo, ameitaka Serikali ya kaunti ya Mombasa kuwekeza zaidi katika matibabu kwa watu hao kadri inavyojizatiti kuboresha vitengo tofauti vya kiafya katika kaunti hiyo.

Huenda wakazi wa kaunti ya Kilifi walijipata matatani baada ya Serikali ya kaunti ya Kilifi kwa ushirikiano na ile ya Kitaifa kutoa masharti mapya dhidi ya janga la Corona katika kaunti hiyo.

Gavana wa Kilifi Amason Jefa Kingi amesema hakuna maiti itakayotolewa wala kuzikwa katika kaunti hiyo bila ya maafisa wa polisi kufahamu la sivyo familia iliondokewa na mpendwa wao italazimika kuwekwa karatini kwa siku 14 chini ya gharama zao.

Kingi ameteta vikali kutokana na tabia ya wakaazi kupenda kubugia pombe ya Mnazi kwa kukongamana mahali pamoja kutokana na tabia ya kupuuza kuwepo kwa janga la Corona nchini.

Hii ni baada ya kubainika kuwa kumekuwa na ukiukaji mkubwa wa maagizo ya serikali kuhusu mazishi wakati huu wa vita dhidi ya Corona.

Kampuni ya kutengeneza mafuta ya kupikia na vile vile sabuni ya ‘Pwani Oil’ imechangia kampeni ya kusafisha mikono katika Kaunti ya Kilifi kwa kutoa jumla ya kilo milioni 5.5 za sabuni kwa Serikali ya Kaunti hiyo.

Mkurugenzi mkuu wa mauzo wa kampuni hiyo Rajul Malde amesema mchango huo utasidia katika kuwahimiza Wakaazi wa Kaunti hiyo kubadili tabia zao kwa kukumbatia uoshaji mikono wa mara kwa mara.

Akizungumza katika kiwanda cha kutengeneza sabuni cha kampuni hiyo eneo la Kikambala Kaunti ya Kilifi mapema leo, Malde amesema wakati huu ambapo Kaunti hiyo ya Kilifi imeorodheshwa miongoni mwa Kaunti zinazokabiliwa na maambukizi ya virusi vya Corona kila juhudi zinapaswa kuwekezwa ili kuwanusuru wakaazi.

Wakati uo huo, kampuni hiyo imetoa mafuta ya kupikia na chakula cha thamani ya shilingi milioni 1.5 kitakachozinufaisha jumla ya familia elfu 10 katika Kaunti hiyo ya Kilifi.

Kampuni hiyo hapo awali ilipunguza gharama ya bidhaa zake ili kuwawezesha wateja wake kununua bidhaa za kampuni hiyo hasa baada ya taifa hili kukabiliwa na janga la Corona.

Taharuki imeshuhudiwa tena katika mji wa Malindi mapema leo baada ya maafisa wa GSU pamoja na maafisa tawala kuendeleza oparesheni kali mjini humo kuwasaka wahudumu wa boda boda waliompiga kamanda wa trafiki eneo hilo.

Oparesheni hiyo ilioongozwa na kamanda wa polisi katika eneo la Malindi imepelekea shughuli za kawaida katika mji wa Malindi kusitishwa wakati wa purukushani hizo zilizochukua zaidi ya masaa matano.

Kamanda wa polisi eneo la Malindi Vitalis Otieno amesema oparesheni hio itaendelezwa hadi pale wahudumu wa boda boda waliompiga na kumjeruhi kamanda wa trafiki eneo la malindi George Naibei wanatakaponaswa.

Hata hivyo wahudumu wa boda boda mjini Malindi wakiongozwa na mwenyekiti wao Joseph Mwangu wamekashifu oparesheni hio wakiwataka maafisa wa polisi kuwasaka waliohusika na uovu huo na wala sio kuhangaisha wakaazi wote wa Malindi.

Seneta wa Kaunti ya Mombasa Mohammed Faki amependekeza kufunguliwa kwa nyumba za Ibada nchini na hasa misikiti ili kutoa nafasi kwa waumini wa dini ya Kiislamu kuendeleza ibada zao wakati wa Mwezi mtukufu wa Ramadhan.

Akiwahutubia wanahabari Mjini Mombasa Faki amesema hali itakuwa tata zaidi kwa waumini wa dini ya Kiislamu endapo misikiti haitafunguliwa kadri mwezi mtukufu wa Ramadhan unapowadia.

Faki amesema katika mswada maalum unaofungamana na maswala ya ugonjwa wa Corona katika bunge la Seneti watapendekeza maswala hayo ya kidini yajumuishwe kwenye mswada huo.

Aidha ameitaka Serikali kupunguza ushuru kwa bidhaa msingi za matumizi ya kila siku ili kumuondolea mwananchi wa chini gharama ya maisha.

Wakati uo huo, ameitaka Serikali kuijumuisha misikiti katika mradi wake wa ugavi wa chakula cha msaada kwa wale wasiyobahatika katika jamii.