Monthly Archives: February 2020

Jumla ya wakaazi 1,500 katika eneo la Singila-Majengo Kaunti ya Taita taveta sasa watapata hati miliki za ardhi.

Hii ni baada ya Gavana wa Kaunti hiyo Granton Samboja kuafikiana na mmiliki wa shamba la makonge katika eneo la Mwatate kuhusu kuitenga sehemu ya ardhi yake ili kuwakimu wakaazi hao ambao wamekuwa wakiishi kama maskwota.

Baada ya usimamizi wa kiwanda cha maziwa cha Brookside kusitisha ununuzi wa maziwa kutokwa kwa wafugaji katika Kaunti ya Taita taveta, sasa Gavana wa Kaunti hiyo Granton  Samboja ameingilia kati utata huo.

Kulingana na Samboja kiwanda hicho kimekuwa kikipata lita 2,000 za maziwa badala ya kiwango cha hapo awali cha lita 5,500 hali iliyousukuma usimamizi wa kiwanda hicho kufunga biashara yake Kaunti hiyo.

Samboja amewakosoa wafugaji katika Kaunti hiyo kwa kuingiza siasa katika mchakato huo wa biashara ya maziwa hasa baada ya kuhadaiwa na madalali katika Kaunti hiyo.

Wakati uo huo,  Samboja amewatahadharisha wafugaji hao dhidi ya kuhadaiwa na madalali katika eneo hilo hali ambayo imedidimiza kabisa biashara hiyo ya maziwa na kuwanyima pato wafugaji hao sawa na Kaunti hiyo.

Aliyekuwa Kinara wa shughuli za bunge la Kaunti ya Mombasa Charles Kitula amebanduliwa nje ya afisi hiyo.

Kitula ambaye ni Mwakilishi wa Wadi ya Freere town katika bunge la Kaunti ya Mombasa amenyang’anywa wadhfa huo ambao umekabidhiwa Mwakilishi wa Wadi ya Chaani Junior Wambua.

Hakuna maelezo yoyote yaliyotolewa kutokana na kubanduliwa nje kwa Kitula japo Kiongozi huyo katika siku za hivi majuzi ameonekana kumpinga vikali Gavana  wa Kaunti ya Mombasa Ali Hassan Joho.

Kitula amekuwa akimkosoa Joho kwa ubaguzi katika ugavi wa fedha za basari akidai fedha hizo zinatolewa kiubaguzi huku baadhi ya Wadi ikiwemo yake ya Freere town eneo bunge la Nyali zikiwachwa nje ya mgao huo.

Mwakilishi wa kike kaunti ya Tanariver, Rehema Hassan akihutubia wananchi mjini Hola./ Picha : Charo Banda

Wadau mbali mbali wa kupambana na ukeketaji katika kaunti ya Tanariver sasa wameshirikiana na viongozi wa eneo hilo pamoja na polisi ili kuendeleza kampeni kupitia michezo ili kukomesha ukeketaji miongoni mwa jamii za wakazi wa eneo hilo .

Akizungumza katika hafla ya kuendeleza kampeni hizo katika uwanja wa shule ya wavulana ya HOLA mwakilishi wa kike kaunti ya Tanariver Rehema Hassan sasa amefichua kuwa tangu vita dhidi ya ukeketaji kuanzishwa visa hivyo vimeanza  kupungua kutoka asilimia 100 hadi 60 pekee.

Mwakilishi huyo amesema kuwa wameamua kuwashirikisha maafisa wa polisi katika kampeni hizo za kumaliza ukeketaji pamoja na mashirika mbali mbali ili kumaliza kabisa visa hivyo.

Kwa upande wake mwanaharakati wa kupambana na visa hivyo Sadia Hussein pamoja na Kassim Maende ambaye ni afisa wa polisi kwa kauli moja wamesema kuwa jamii inafaa kusitisha mila hizo zilizopitwa na wakati wakisema kuwa sasa ni wakati wa wanaondeleza ukeketaji kukabiliwa kisheria.

MV Jambo ikisafirisha abiria katika kivuko cha feri, Likoni. / Picha Gabriel Mwaganjoni

Bunge la Seneti linafuatilia kwa karibu mno shughuli katika kivuko cha feri cha Likoni ili kuhakikishia usalama watumizi wa kivuko hicho.

Kulingana na Seneta wa Kaunti ya Mombasa, Mohammed Faki, kivuko hicho katika kipindi cha mwaka uliyopita kimekabiliwa na changamoto nyingi mno, huku watumizi wakiingiwa na hofu kufuatia ajali za mara kwa mara kivukoni humo.

Akizungumza mjini Mombasa, Faki amesema kwamba feri ya MV- Safari ambayo imekuwa ikijengwa nchini Uturuki itawasili katika kivuko hicho baadaye mwezi huu wa Februari au mwanzoni mwa mwezi Machi na inatarajiwa kusaidia pakubwa katika kuziboresha shughuli katika kivuko hicho.

Kiongozi huyo amehoji kwamba ni sharti shughuli katika kivuko hicho ziangaziwe hasa ikizingatiwa kwamba kivuko hicho huunganisha taifa hili na lile jirani la Tanzania.

Kauli ya Faki inajiri huku hali ya msongamano ikikikumba kivuko hicho hasa baada ya feri mbili za MV-Likoni na MV- Nyayo kuondolewa kivukoni humo ili kufanyiwa ukarabati.

Wahudumu wa maboti ya uchukuzi wa abiria katika mkondo wa Bahari hindi wa Ganaola huko Mikindani Kaunti ya Mombasa./Picha Gabriel Mwaganjoni.

Wahudumu wa maboti ya uchukuzi wa abiria katika mkondo wa Bahari hindi wa Ganaola huko Mikindani Kaunti ya Mombasa wametakiwa kutumia vifaa maalum vya usalama pindi wanapoendeleza shughuli zao za uchukuzi baharini.

Kiongozi wa kijamii wa eneo hilo Wanje Ziro amezema manahodha na abiria wao hupuuza kuvaa makoti maalum ya usalama sawia na kuzingatia maswala mengine muhimu ya kuzuia mikasa katika bahari hindi.

Akizungumza huko Ganaola mapema leo, Mzee Ziro amehoji kwamba mikasa inayoshuhudiwa katika eneo hilo ya maboti kupinduka mara nyingi inatokana na uendeshaji wa maboti hayo kiholela na kuwabeba abiria kupitia viwango hitajika ili kuwavukisha hadi upande wa Rabai Kaunti ya Kilifi.

Ziro ametaka abiria kulazimishwa kuvalia makoti hao ya usalama, maboti hayo kuzuiliwa kuwabeba abiria kupata kiasi, na maboti hayo kukaguliwa ili kubaini iwapo yako katika hali nzuri.

Kauli ya Ziro inajiri siku mbili tu baada ya mwanamume mmoja kufariki baada ya kuzama maji kufuatia mkasa wa boti katika eneo hilo la Ganaola huko Mikindani  Kaunti ya Mombasa.

Mshirikishi mkuu wa usalama kanda ya Pwani John Elungata/ Picha Gabriel Mwaganjoni.

Idara ya usalama katika Kaunti ya Mombasa inamsaka mshukiwa sugu wa ulanguzi wa dawa za kulevya.

Mshirikishi mkuu wa utawala Kanda ya Pwani John Elungata amesema mshukiwa huyo anayeshirikiana na mwenzake katika maeneo ya Mtongwe huko Likoni amekuwa akikwepa mtego wa kikosi cha kupambana na dawa za kulevya.

Elungata aliyekuwa akizungumza katika eneo la Likoni amehoji kwamba kamwe kikosi hicho hakitalegeza kamba hadi pale kitakapomtia mbaroni mlanguzi huyo na kumuadhibu barabara kwa mujibu wa sheria.

Wakati uo huo, Elungata ameitaka jamii hasa wazee wa mtaa kuwafichua walanguzi kwa kikosi cha kupambana na mihadarati Kaunti ya Mombasa ili wakabiliwe.

Operasheni hiyo ya kuwasaka walanguzi wa dawa za kulevya katika Kaunti ya Mombasa imeingia juma la pili sasa ikiyaangazia maeneo ya Kisauni, Likoni, Changamwe, maeneo ya Majengo na Mji wa kale katika Kaunti hiyo.