Monthly Archives: January 2020

Mkurugenzi wa idara ya utabiri wa hali ya hewa nchini Bi Stela Aura.

Mataifa ya Jumuiya ya Maendeleo Afrika Mashariki na pembe Ya Afrika yatashuhudia viwango vya juu vya mvua na joto katika msimu wa miezi ya Machi, Aprili na Mei.

Akitoa mwelekeo wa msimu huo uliotolewa na shirika la kutabiri hali ya hewa la (ICPAC), Mkurugenzi mkuu wa idara ya utabiri wa hali ya hewa nchini Bi Stella Aura amesema kuwa maeneo ya magharibi, kusini magharibi mwa Kenya, Uganda Mashariki, Magharibi mwa Rwanda na Sudan Kusini yatapokea Mvua kubwa ambazo zinauwezo wa kusababisha mafuriko.

Bi Stella amezihimiza idara husika kuchukua tahadhari ya mapema ya kuepukana na majanga yatakayosababishwa na mvua ya msimu wa masika.

Kulingana na Mkurugenzi huyo mvua ya msimu wa vuli itaanza mapema katika maeneo ya kaskazini mwa Tanzania, Uganda, Magharibi na Kaskazini mwa Kenya, kusini Magaribi mwa Ethiopia na Somalia kusini.

Hata hivyo mvua itachelewa kunyesha katika maeneo ya kati na kaskazini mashariki mwa Ethiopia na kaskazini mwa Somalia huku viwango vya juu vya joto vikitatarajiwa katika nchi ya Eritrea na sehemu za mashariki mwa Somalia na Ethiopia.

Bi Stela aidha amezihimiza idara husika kuchukua hatua baada ya kupata utabiri wa hali ya hewa katika mipangilio yao ili uweze kumsaidia mwananchi wa kawaida.

Baada ya kutolewa kwa utabiri huu wa Mataifa ya Jumuiya ya Maendeleo Afrika Mashariki na pembe Ya Afrika, nchi wanachama zinatarajiwa kutoa utabiri wa nchi zao ndani ya mwezi.

Wakaazi katika ukanda wa Pwani wameshauriwa kuweka mikakati na mbinu za kuhifadhi maji ya mvua kwa matumizi mbalimbali nyakati za ukame.

Akizungumza katika kongamano la 54 la kutathmini hali ya hewa ilivyokuwa mwaka uliopita sawia na utabiri wa miezi  mitatu ijayo, afisa katika shirika la ICPAC ,Anthony Musili amehoji kuwa kaunti ndogo ya malindi,kaunti ya Kilifi ilirekodi kiasi kikubwa cha mvua zaidi ya ile iliyotarajiwa.

Musili ameitaka jamii kuwekeza katika uhifadhi wa maji kwani maji mengi ya mvua huwachwa pasi na kuhifadhiwa ilhali yangeweza kutumika katika manufaa mengine nyakati za ukame.

Musili ameongeza kuwa kutokana na utafiti imebainika kuwa Kenya kwa jumla ilipokea mvua kubwa zaidi ya kawaida jambo lililopelekea shinikizo kuhusiana na umuhimu wa kuhifadhi maji.

Musili vilevile ameitaka jamii kuzingatia taarifa za utabiri wa hali ya hewa kwa kile alichokitaja kuwa ni njia mojawapo ya kuepuka na majanga yanayosababishwa na hali ya hewa mbali na kuweka mikakati ya kufanikisha shughuli za kila siku ikizingatiwa kwamba kila mmoja huhitaji habari hizi.

Mkurugenzi wa idara ya utabiri wa hali ya hewa nchini Bi Stela Aura.

Serikali za mataifa ya IGAD zimehimizwa kuzingatia utabiri wa hali ya hewa katika mpangilio wake ili kuepukana na maafa na hasara inayopatikana kutokana na mabadiliko ya tabia nchi.

Akizungumza katika Makala ya 54 ya kongamano la kuthathmini mwelekeo msimu  wa Machi, Aprili,Mei (MAM)  utakavyokuwa, katibu katika wizara ya mazingira na misitu, Mohammed Elmi, amesema kuwa mabadiliko ya tabia nchi yameathiri pakubwa usalama wa chakula.

Kulingana na Elmi watu milioni 25 katika mataifa ya IGAD wanakumbwa na ukosefu mkubwa wa chakula hali aliyoitaja kuwa inaweza kutatuliwa iwapo utabiri wa hali ya hewa utatiliwa manani katika mipangilio ya kilimo.

Naye mkurugenzi wa idara ya utabiri wa hali ya hewa nchini Bi Stela Aura amesema kuwa watu takriban 236 walifariki mwaka jana kutokana na kupuuzwa kwa utabiri wa hali ya hewa. Jambo analosema linaweza kuepukwa iwapo utabiri wa hali ya hewa utachukuliwa kwa umuhimu mkubwa.

Gavana wa Nairobi Mike Mbuvi Sonko ameteua Ann Kananu Mwenda kuwa naibu Gavana wa kaunti ya Nairobi, ikiwa ni miaka miwili sasa tangu aliyekua Naibu gavana kaunti hiyo Polycarp Igathe kujiuzulu.

Gavana sonko amesema Bi Kananu ataanza rasmi kutekeleza majukumu yake punde tu wawakilishi wadi wa bunge la kaunti ya Nairobi watakapokamilisha zoezi la kumpiga msasa.

Sonko amewataka wajumbe wa bunge la kaunti ya Nairobi kuharakisha zoezi la kumpiga msasa Bi Kananu ambae kwa sasa anahudumu kama afisa mkuu wa kitengo cha kukabiliana na majanga.

Wazazi na wanafunzi wa Kaunti ya Lamu wamehakikishiwa usalama wa kutosha wakati huu ambapo muhula wa kwanza umeanza rasmi.

Kamishna wa Kaunti ya Lamu Irungu Macharia amesema swala la usalama limezingatiwa akiwataka wazazi kuwapeleka watoto wao shuleni kwani mazingira ya shule yana ulinzi wa kutosha.

Macharia amesema Idara ya usalama imeimarisha doria kila pembe ya Kaunti hiyo ili kuhakikisha shughuli za kila siku zinaendelea bila ya wasiwasi wowote.

Wakati uo huo, Wakaazi wa Boni Kaunti ya Lamu wamedinda kuwapeleka watoto wao shuleni licha ya amri kutoka kwa Mshirikishi mkuu wa utawala Kanda ya Pwani John Elungata kuwataka Wazazi hao kuwapeleka shuleni kwani shule zilizofungwa tangu mwaka 2014 zimefunguliwa.

Jeshi la Marekani limethibitisha kwamba afisa mmoja wa jeshi la Marekani na wahudumu wengine wawili katika kambi ya kijeshi ya Manda Kaunti ya Lamu walifariki wakati wa shambulizi la kigaidi lilitekelezwa hapo jana katika kambi hio.

Katika taarifa kutoka kwa jeshi hilo, wanajeshi wegine wawili wa Marekani walijeruhiwa vibaya japo wanaendelea na tiba ya dharura na watasafirishwa hadi marekani kwa matibabu maalum.

Kamanda mkuu wa jeshi la Marekani anayesimamia kikosi maalum Barani Afrika Stephen Townsend amesema majina ya watatu hao hayawezi kufichuliwa kwa sasa kwani jamaa zao hawajafahamishwa kuhusu maafa hayo.

Townsend amesema marekani haitawalegezea kamba wanamgambo wa Al-shabab ambao wameonekana kuimarisha mashambulizi yao katika vituo mbalimbali vya wanajeshi wa Marekani Barani Afrika.

Kauli ya Townsend inajiri huku wanajeshi wa Marekani wakiwatia nguvuni washukiwa wa Al-shabab waliyojaribu kuingia kwa lazima katika kambi ya wanajeshi wa marekani eneo la Nanyuki Kaunti ya Laikipia mapema leo.

Mkurugenzi mkuu wa Shirika la utetezi wa haki za kibinadamu la MUHURI Hassan Abdille amesema ufisadi katika Serikali za Kaunti humu nchinibado ni kikwazo kikuu katika mchakato wa maendeleo mashinani.

Abdille amesema serikali za Kaunti zimeshiriki ufisadi katika idara zote zikiwemo kuajiri watu, ununuzi wa bidhaa, utoaji wa huduma msingi miongoni mwa idara nyinginezo muhimu.

Abdille amesema ni lazima Kaunti za hapa Pwani zijitenge na ufisadi na upendeleo katika utoaji wa zabuni hasa kwa Vijana na akina mama.

Abdille amezitaja harakati zinazofanywa na Rais Uhuru Kenyatta, Mkurugenzi mkuu wa mashtaka ya umma nchini Noordin Hajj, Mkurugenzi mkuu wa Idara ya upelelezi George Kinoti kama mwafaka, akisema ni sharti Magavana waunge mkono juhudi hizo.

Mtetezi huyo wa haki za kibinadamu hata hivyo anasisitiza adhabu kali kwa washiriki wote wa ubadhirifu wa mali ya umma.

Mbunge wa Kandara Alice Wahome amezidi kukosolewa kufuatia madai yake kwamba mpango wa BBI unalenga kuwaeka baadhi ya wanasiasa uongozini akiwemo Rais Uhuru Kenyatta baada ya uchaguzi wa mwaka wa 2022.

Wa hivi punde kumkashfu Bi Wahome ni Mbunge wa Likoni Bi Mishi Mboko aliyemtaka Bi Wahome kutozua mijadala inayolenga kuligawanya taifa badala ya kuunga mkono mchakato wa kuunganisha.

Mboko hata hivyo amesema uamuzi wa muongozo tofauti wa taifa hili umo mikononi mwa wakenya na wala sio wanasiasa wachache.

Kauli ya Mboko inajiri baada ya Mbunge huyo wa Kandara Kaunti ya Murang’a Bi Ali Wahome akiwa kule Mjini Malindi juma lililopita kuweka bayana kwamba jopo kazi la maridhiano BBI linalenga kuwaeka Rais Uhuru Kenyatta na Kinara wa ODM Raila Odinga uongozini na haina malengo ya kuwaunganisha Wakenya.

Wanyama wakiteketea katika moto wa nyika Australia. Picha/ kwa hisani

Takriban wanyama milioni 500 wamekufa katika eneo la New South Wales pekee huko Australia huku mamia ya watu wakiachwa bila makao kufuatia moto mkubwa wa nyika unaoendelea kushuhudiwa.

Msimu wa moto wa nyika huwa ni jambo la kawaida Australia ila mwaka huu moto huo umeripotiwa kuwa mbaya zaidi. Tangu mwezi Septemba watu 19 wameripotiwa kufariki huku zaidi ya 12 wasijulikane waliko. Viwango vya joto vimeripotiwa kufikia nyuzi joto 41. Tayari ekari milioni nne zimeteketea katika moto huo – ekari moja ni sawa na uwanja mmoja wa mpira.

Afisaa wa zima moto aliyezidiwa na hali ilivyo huko Australia. Picha/ Kwa hisani

Moto huu ni mgumu kuzimwa kutokana na ukame ukiambatana na upepo mkavu unaosababishwa na hali ijulikanayo kama positive Indian Ocean Dipole.

Hali hii hutokea pale eneo la bahari hindi linalopakana na Pwani ya Afrika mashariki linaposhuhudia joto jingi huku eneo linalopakana na Australia linapokuwa na kiwango cha chini cha joto. Hali hii hupelekea mvua kubwa kunyesha Afrika mashariki huku Australia ikisalia kuwa bila mvua.

Vilevile itakuwa vigumu kuuzima moto huo kwani msimu wa ukame unatarajiwa kuisha mwezi Februari au Machi.

Wanasayansi wamesema kuwa hili ni dhihirisho moja wapo la kuongezeka kwa athari za mabadiliko tabia nchi yaani Climate Change. Ulimwengu kwa sasa upo na viwango vya juu vya joto kutokana na kupungua kwa kiwango cha misitu na uchafuzi wa hewa unaofanywa na viwanda.

Ili kupunguza athari hizi tunashauriwa kupanda miti kwa wingi na kupunguza uchafuzi wa mazingira.