Monthly Archives: October 2019

Takriban wanafunzi 408 kutoka shule 15 za msingi  katika kaunti ya Kilifi wamelazimika kuufanyia mtihani wao wa kitaifa katika vituo vingine baada ya shule zao kuuathirika na mafuriko.

Akiongea na wanahabari baada ya kufungua rasmi makasha ya mtihani mapema leo kule Malindi mkurugenzi mkuu wa elimu kaunti ya Kilifi Eunice Khaemba amesema kuwa shule 10 zilizoathirika ni kutoka maeneo ya Ganze pamoja na shule 5 za eneo la Kauma.

Amesema kuwa wanafunzi hao wamehamishwa hadi eneo la Vitengeni ambapo ni kituo chenye nafasi za malazi na hata ni eneo ambalo haliwezi tatiza hali ya usafiri.

Mkurugenzi huyo aidha amesema kuwa kaunti ya Kilifi ina jumla ya wanafunzi 34,367 ambao wanaukalia mtihani wao wa KCPE huku kukiwa na jumla ya vituo 661 vya mtihani vilivyosajiliwa .

Vile vile Bi. Khaemba amefichua kwamba kaunti ya Kilifi ina jumla ya vituo 222 vya wanafunzi wa kidato cha nne ambao pia wanaendelea na mtihani wao wa KCSE.yaan practicals japo mtihani wenyewe utaanza wiki ijayo huku akiwaonya  wanafunzi kujitenga na vishawishi vya udanganyifu

Chama cha Wamijikenda cha ‘Taireni Association of Mijikenda’ kinataka Mkurugenzi mkuu wa bandari ya Mombasa Daniel Manduku kubanduliwa mamlakani kufuatia azma yake ya kutaka kukata rufaa kuhusu kesi iliyoitisha mkataba wa kubinafsisha eneo la pili la kuegesha makasha katika bandari hiyo.

Mwenyekiti wa Chama hicho Peter Ponda Kadzeha amesema Manduku analenga kuwakandamiza Wapwani kiuchumi hasa kuhusiana na Bandari hiyo ya Mombasa akitaka abanduliwe mamlakani na Mkurugenzi mwengine atakayeliangazia barabara swala la uchumi wa Pwani kukabidhiwa majukumu hayo.

Kulingana na Kadzeha, Manduku amedhihirisha wazi kwamba hana nia yoyote ya kubadilisha hali ya maisha ya Pwani wala kushirikisha Mpwani katika maswala ya kimaendeleo kupitia kwa pato linalopatikana kutoka kwa bandari hiyo ya Mombasa na kamwe hafai kuisimamia bandari hiyo.

Manduku ameweka bayana kwamba atakata rufaa kufuatia uamuzi wa mahakama uliyotaka kusitishwa mara moja kwa mkataba kati ya Serikali ya Kenya na kampuni ya Mediterranean mkataba utakaoikabidhi kampuni hiyo majukumu ya usimamizi wa eneo la kuegesha makasha la ‘Container terminal -2 katika Bandari hiyo ya Mombasa.

Onyo kali limetolewa kwa wale wanaonyakua maeneo yanayotumiwa na wavuvi ili kuegesha maboti yao au kuendeleza shughuli zao za uvuvi.

Mbunge wa Mvita Abdulswamad Shariff Nassir ameutaja unyakuzi huo kama uliyosambaratisha shughuli za kiuchumi kwa wavuvi hao akitaja hali hiyo kukomeshwa mara moja.

Amesema ataliwasilisha swala hilo bungeni ili kuona kwamba wanyakuzi hao wanaandamwa ili kutoa nafasi kwa wavuvi kuendeleza shughuli zao bila ya kuhangaishwa na mabwenyenye hao.

Wakati uo huo, Nassir ametaka usimamizi wa bandari zote za Ukanda wa Pwani kuwa chini ya Serikali za Kaunti zinazopakana na Bahari hindi na wala sio Serikali kuu.

Nassir ameyasema hayo wakati wa uzinduzi wa maboti 28 kwa wavuvi wa Kaunti hiyo ya Mombasa.

Wafanyibiashara wawili wametozwa dhamana ya shilingi milioni 10 au pesa taslimu shilingi milioni 3 kila mmoja baada ya kukabiliwa na madai ya kukwepa ushuru.

Mahakama imeelezwa kwamba Abdisalam Abdullahi Gedi na mwenzake Yahye Elias Bare wakiwa Wakurugenzi wa kampuni ya uchukuzi ya Liban Trading Limited walikwepa kulipa ushuru kwa mamlaka ya ushuru nchini licha ya kukusanya kima cha shilingi milioni 740.1 katika kipindi cha miaka mitatu katika biashara yao.

Wakili wa mamlaka ya ushuru nchini KRA Moses Ado, ameiambia mahakama kwamba wawili hao pamoja na mshukiwa wa tatu Mohammed Hassan Ali, licha ya kupata pato la shilingi milioni 329.9 kufikia mwezi Juni mwaka wa 2013, na kukusanya shilingi milioni 146.2 mwaka wa 2014 sawa na pato la shilingi milioni 263.9 mwaka wa 2015 hawakulipa ushuru wowote.

Ado amesema wasimamizi hao walikuwa wakijaza alama ya sufuri kwenye nakala maalum za ushuru za mamlaka hiyo ndipo wakaandamwa na maafisa wa ujasusi na kutiwa nguvuni.

Wawili hao wamekanusha mashtaka hayo na mbele ya Hakimu mkuu wa mahakama ya Mombasa Edna Nyaloti huku kesi yao ikiratibiwa kuanza kusikizwa tarehe 8 mwezi ujao wa Novemba.

Kampuni ya mawasiliano ya Safaricom imemteua Peter Ndegwa kama afisaa mkuu mtendaji.

Ndegwa ambaye amewahi kuwa mkurugenzi wa fedha katika kampuni ya vileo ya East African Breweries ataingia madarakani Aprili 1 mwaka wa 2020.

Bwana Ndegwa anakuwa mkenya wa kwanza kuongoza kampuni hiyo ya mawasiliano ambayo kwa sasa inaongozwa na Michael Joseph baada ya kufariki kwa Bob Collymore.