Monthly Archives: August 2019

Vifaa vitatu vinavyotumika kukusanya takwimu katika zoezi linaloendelea la kuhesabu watu vimeibwa katika eneo la Likoni Kaunti ya Mombasa.

Kamishna wa Kaunti hiyo Gilbert Kitiyo amesema mmoja wa Maafisa hao alivamiwa na genge la watu nyakati za usiku na kunyang’anywa kifaa kimoja, huku vingine viwili vikiibwa katika nyumba ya makaazi ya Maafisa wengine wawili akisema tukio hilo linachunguzwa.

Hata hivyo licha ya baadhi ya changamoto hizo, zoezi hilo linaendelea vyema katika Kaunti hiyo na kufikia sasa asilimia 80 ya Wakaazi wa Kaunti hiyo wamehesabiwa.

Akizungumza Mjini Mombasa mapema leo, Kitiyo amehimiza ushirikiano ili kulifanikisha zoezi hilo, akiwataka Wakaazi watakaoachwa nje ya zoezi hilo kuripoti kwa Maafisa tawala ili wahesabiwe.

Zoezi hilo la sensa linakamilika siku ya Jumamosi juma hili.

Mbunge wa Matuga, Kassim Sawa Tandaza

Mbunge wa Matuga, Kassim Sawa Tandaza  amesema kuwepo na vituo vya kurekebisha walanguzi wa mihadarati hakutachangia kumaliza suala la mihadarati.

Kwa mazungumzo ya kipekee na mwandishi wetu mjini Mombasa Tandaza amesema endapo vituo hivyo vitakuwa vikiendelea kuhudumu basi ulanguzi wa mihadarati hauta koma hapa Pwani.

Wakati uo huo amevitaka vitengo vya usalama kushika doria kikamilifu nchi kavu na majini ili kuhakikisha hakuna namna ambayo mihadarati inafikia watumizi.

Ni sharti jamii ya Ukanda wa Pwani ijizatiti katika kuwasaidia waraibu waliyojinasua katika utumizi wa dawa za kulevya kuregelea uraibu huo.

Mkuurgenzi mkuu wa Shirika linalopamba na uraibu wa dawa za kulevya Pwani la ‘Reachout Centre Trust’ Taib Abdulrahman amesema mara nyingi vijana wanaojinasua na kisha kuregelea tena uraibu wa dawa za kulevya huwa wamekosa ushauri wa mawazo na kuelekezwa jinsi watakavyodhibiti maisha yao upya.

Akizungumza mjini Mombasa hii leo, Taib amehoji kwamba ni lazima jukumu hilo litekelezwe kikamilifu na jamii yenyewe kabla ya vitengo mbalimbali vya Serikali kuingilia kati katika kuwasaidia Vijana hao kujitenga na uraibu wa dawa za kulevya.

Kulingana na Mwanaharakati huyo wa kupambana na uraibu wa dawa za kulevya Pwani, hata hivyo Serikali inapaswa kuidhinisha miradi mbalimbali kwa ajili ya kuwazuia vijana wanaojinasua kuregelea tena uraibu.

Taarifa Sammy Kamande.

Kamanda mpya wa polisi kaunti ya Mombasa Augustine Ndhumbi amewataka wakaazi wa kaunti hiyo kushirikiana na idara ya usalama katika kuimarisha usalama wa kaunti hiyo.

Akizungumza kule mjini Mombasa, Ndhumbi amedai kuwa ili usalama uimarishwe zaidi ni lazima wakaazi wawafichue wanaotatiza usalama wa kaunti hiyo.

Kwa upande wake aliyekuwa kamanda wa posili Johnstone Ipara amesema ushirikiano baina ya jamii na maafisa wa usalama umechangia pakubwa katika kuimarisha usalama kaunti ya Mombasa.

Naye aliyekuwa Meya wa Mombasa Ahmed Muhdhar amewahimiza vijana kuwafunzisha vijana wenzao kuhusu umuhimu wa maadili na kujitenga na visa vya utovu wa usalama na itikadi kali.

Taarifa na  Sammy Kamande.

Jamii ya watu wanaoishi na Ulemavu katika kaunti ya Mombasa, sasa inaitaka serikali ya kitaifa kuwaajiri watafsiri wa lugha ishara ili wajumuike na maafisa wa kuhesabu watu wakati wa zoezi la sensa.

Katibu wa Shirika la Walemavu mjini Mombasa Ruth Awinja amesema walemavu ambao hawana uwezo wa kuongea hawataweza kupeana idadi kamili ya watu wa familia yao hali ambayo itachangia kupata idadi duni.

Awinja ameitaka serikali kuangazia suala hilo kwa haraka kabla ya shughuli hiyo kuanza rasmi hapo kesho.

Wakati uo huo amewataka wazazi kutowaficha watoto wao wenye ulemavu wakati wa zoezi hilo ili kuhakikisha serikali inapata idadi kamili.

Taarifa Alphalet Mwadime.

Mashirika yasiokuwa ya Kiserikali katika kaunti ya Mombasa yamewarai wakaazi wa kaunti hiyo kutosafiri hadi sehemu za bara wakati wa zoezi la Sensa.

Mashirika hayo yakiongozwa na lile la Haki Africa, chini ya Afisa wa maswala ya dharura Mathias Shipeta, yameasema ni kinyume kwa watu hao kusafiri hadi sehemu za bara ili kuhesabiwa nyumbani.

Shipetta amesema safari za watu hao zitasababisha mgao wa chini wa mapato kwa kaunti hiyo, akiwataka kusitisha safari hizo na kuhesabiwa wakiwa katika kaunti ya Mombasa.

Akiunga mkono kauli hiyo, Mkurugenzi wa Shirika la Vijana la Manyatta Nicholus Songora amewataka wakaazi wa kaunti hiyo na Pwani kushiriki zoezi hilo ili wanufaike na raslimali za kitaifa.

Zoezi hilo la kuwahesabu watu linaandaliwa usiku wa tarehe 24 na 25 mwezi huu.

Taarifa Gabriel Mwaganjoni

Aliyekuwa katibu wa Serikali ya Kaunti ya Mombasa Francis Thoya ameitaka Serikali kuzindua upya shughuli za kusafisha na kusafirisha mafuta ya petroli zilizokuwa zikiendelezwa katika eneo la Changamwe kaunti ya Mombasa.

Thoya amesema kiwanda cha ‘Kenya Petroleum Refineries Limited’ katika eneo la Changamwe kilitekeleza majukumu makubwa ya kulikuza taifa hili kiuchumi na kufungwa kwake hakujaleta manufaa yoyote kwa wakaazi wa Mombasa.

Akizungumza na Wanahabari, Thoya amesema kaunti ya Mombasa itasambaratika kiuchumi ikiwa viwanda kama hivyo vitafungwa licha ya kuwa tegemeo kubwa la ukuaji wa uchumi.

Kiwanda hicho kwa sasa kinatumika kama hifadhi ya mafuta pekee huku asilimia 50 ya shughuli za usafishaji na usafirishaji wa mafuta ya petroli kutoka Bandari ya Mombasa zikisalia kufungwa kwa takriban miaka 10 sasa.