Monthly Archives: July 2019

Wakaazi wa maeneo ya Samburu, Taru na Macknon road katika Gatuzi dogo la Kinango wameonywa dhidi ya kuyavamia magari katika barabara kuu ya kutoka Mombasa kuelekea Jijini Nairobi na kuiba mizigo.

Kamanda mkuu wa polisi katika Ukanda wa Pwani Marcus Ocholla amesema madereva wanaotumia barabara hiyo kuu wakisafirisha shehena inayotoka katika bandari ya Mombasa mara kwa mara huvamiwa na mizigo hiyo kuibwa hasa nyakati za usiku.

Akizungumza baada ya kufanya vikao vya umma katika maeneo hayo, Ocholla amewataka Wakaazi hao kukomesha mara moja tabia hiyo ailiyoitaja kama hatari kwa maisha yao na inayowatishia wawekezaji vile vile.

Ocholla vile vile amewakosoa Wakaazi hao kwa kuyavamia matrela ya kusafirisha mafuta ya petroli na kuchota mafuta hayo au yale ya dizeli pindi magari hayo yanapokumbwa na hitilafu barabarani, akisema kwamba hatua hiyo ni hatari mno na Mafisa wa usalama watapambana na wezi hao.

Kamanda huyo wa polisi katika Ukanda wa Pwani ametaja wizi wa chakula kama vile mchele, maharagwe, sukari na ngano kutoka kwa malori kama uliyokithiri mno katika maeneo hayo.

Waziri wa Michezo, Utamaduni na Turathi za kitaifa Balozi Amina Mohammed amesema ameridhishwa na ujenzi wa ukuta katika ngome ya kitaifa ya Fort Jesus Mjini Mombasa.

Ujenzi huo unalenga kuzuia makavazi hayo ya kitaifa kuliwa na Bahari hindi.

Kulingana na Amina, ujenzi huo umefanyika kulingana na mipangilio na utazuia kumomonyoka kwa Makavazi hayo ya kitaifa ambao yalikuwa katika hatari na kuliwa na Bahari hindi na hatimaye kubomoka kabisa.

Akizungumza baada ya kukagua ujenzi huo, Bi Mohammed amesema kwamba tayari Idara ya makavazi ya kitaifa nchini imekabidhiwa cheti cha kukamilika kwa ujenzi huo akisema kwamba vile vile litaboreshwa na kuwa eneo la Wakaazi na wageni kujivinjari.

Amehoji kwamba huenda ujenzi huo ukapanuliwa zaidi hadi katika upande wa hospitali ya kibinafsi ya Mombasa yaani ‘Mombasa hospital’  inayoshikana na ngome hiyo ya kitaifa ya Fort Jesus.

Shirika la Afya duniani WHO limesema kuwa takribani  watoto million 250 kote duniani chini ya miaka 8 wapo katika hatari ya kukumbwa na maradhi yanayoambatana na ukosefu wa lishe bora.

Akihutubu kongamano la kitaifa  la wadau  kuhusu maendeleo ya watoto, afisa wa maendeleo ya watoto kutoka shirika la afya duniani WHO Martini Chabi, amesema kuna haja ya wazazi kuzingatia kwa umakini afya ya watoto kutoka  wanapozaliwa ili kuhakikisha wanakuwa katika hali iliyo bora kiakili na kiafya akitaja ukosefu wa lishe bora kwa watoto huchangia ukuaji hafifu wa kiakili jambo linalowapelekea kukosa uwezo wa kufanya vyema hata masomoni mwao.

Amesema ili kufikia malengo ya elimu bora, afya bora pamoja na kupunguza umasikini ukuaji wa mtoto ndio eneo ambalo linastahili kutiliwa mkazo zaidi.

Wakati uo huo mwenyekiti wa mtandao wa elimu ya chekechea (ECD) Teresa Mwona amesema ili kulinda hali ya baadaye ya watoto nchini ni jukumu la serikali pamoja na wadau mbali mbali kushiriana ili  kuhakikisha kuna utaratibu  wa kisheria kahusu maendeleo ya watoto.

Taarifa na Gabriel Mwaganjoni

MOMBASA, Kenya, Julai 29 – Miaka mitatu baada ya Kituo cha Radio Kaya kuangazia kuhusu wizi wa vigango kutoka humu nchini na kuuzwa nchi za Ng’ambo hatimaye Vigango hivyo viemanza kurudishwa humu nchini.

Kigango ni sanamu ya mtu aliyekuwa kwenye Baraza la Gohu lililo na majukumu ya kuongoza jamii ya Wagiryama na aliyechongwa kwa mti maalum ujulikano kama ‘Mwanga’ na ambacho hupandwa kwenye kaburi au eneo maalum la boma la familia.

Katika makala Kigango hatarini mwanahabari Dominick Mwambui alielezea jinsi walaghai walivyoiba vigango kutoka kwa vigojo na kuviuzia watalii.

Katika makala hayo wazee wa Kaya wakiongozwa na muungano wa Utamaduni wa Malindi (MADCA) waliitaka wizara ya utalii kufanya kila juhudi ili kurudisha vigango hivyo.

Hivi leo katika makavazi ya Fort Jesus Wazee wa Kaya hapa Pwani wamebubujikwa na machozi baada ya kukabidhiwa vigango hivyo katika hafla iliyoongozwa na Waziri wa Michezo, tamaduni na turathi za kitaifa Balozi Amina Mohammed. Wazee hao wakiongozwa na Mzee Kazungu Hawe Risa wamekabidhiwa jumla ya vigango 30.

Kwa upande wake, Katibu wa chama cha kitamaduni cha Malindi District Cultural Association-MADCA Joseph Karisa Mwarandu ameitaja hatua hiyo kama kubwa ya kuhifadhi roho za wazee wa baraza la ‘Gohu’ ambalo lina majukumu ya kutunga sheria na kutoa muongozo kwa jamii ya Wagiryama ambazo ziliibwa na Waingereza miaka ya 60 hadi 80 katika maeneo ya Kilifi.

Mwarandu hata hivyo amefichua kwamba kutokana na wizi wa Vigango hivyo vilivyosafirishwa hadi mataifa ya Uingereza na Marekani miaka ya 80 jamii ya Wamijkenda na hasa Wagiryama imehangaishwa na maswala mbalimbali yakiwemo ukame.

Waziri Amina amewahakikishia wazee hao kwamba wizara yake inajitahidi kuvinasua vigango zaidi zilivyoibwa kwao na kusafirishwa hadi Marekani na Uingereza akisema kwamba tayari vigango vingine 29 viko katika uwanja wa kimatifa wa ndege wa Jomo Kenyatta Jijini Nairobi na hivi karibuni vitakadhibiwa wazee hao.

Akizungumzia tukio hilo mwanahabari Dominick Mwambui amelitaja kama la kipekee na kuihimiza wizara ya utalii kuviachilia vigango zaidi vilivyozuiliwa katika nchi za ulaya.

Muungano wa wanahabari wa michezo nchini umemtaja aliyekuwa mchezaji wa Zoo Kericho Denis Chetambe kama mchezaji bora wa mwezi Mei na Juni.

Mchezaji huyo mwenye umri wa miaka 25 alipata jumla ya alama 17 huku akimpiku mpizani wake Boniface Muchiri wa klabu ya Tusker ambaye alipata alama 15 kwa mujibu wa muungano huo wa wanahabari.

Kiungo huyo mbunifu amekabidhiwa kikombe pamoja television ya inchi 42 kwa kuonyesha ueledi wake kwa kuisaidia timu yake ya Zoo kuepuka shoka la kushushwa daraja msimu uliopita kabla ya kujiunga na timu ya Bandari.

Kulingana na Muungano huo bado timu hiyo ya Bandari haija andikisha kandarasi mpya na mdhamini mkuu Sportpesa huku mchezaji huyo akitazamiwa kupokea shilingi laki 1 pindi timu hiyo itakapo andikisha kandarasi hiyo mpya.

Hata hivyo Chetambe hakuficha furaha yake baada ya kupokea tuzo hizo huku akisema kwamba zinampa changamoto kubwa za kuweza kufanya bidii na kunawiri Zaidi.

Kwa sasa Chetambe amesema kwamba kujiunga kwake na timu ya Bandari ni changamoto mpya huku akiutazamia upinzani mkubwa kutoka  kwa wachezaji wenzake utakao msaidia kujiimarisha zaidi kisoka.

Kwa upande wake Naibu mkufunzi wa timu ya Bandari  Solomon Mwakola ameusifia ujio wa kiungo huyo kwenye kikosi hicho huku akisema kwamba atasaidia pakubwa katika timu hiyo wanapo anza maandalizi ya mechi zao za ligi kuu nchini.

Ili kuhakikisha kuendelea kwa shughuli za Serikali bila shida  yeyote na kutimizwa kwa majukumu katika Hazina ya Kitaifa na Wizara husika kufuatia  agizo la Mahakama linalomhusu Waziri wa Hazina ya Kitaifa na Mipango Bw. Henry Rotich na Katibu wa Hazina ya Kitaifa Dkt. Kamau Thugge, Rais  amefanya mabadiliko yafuatayo Serikalini:

(I)     Mheshimiwa Balozi, Ukur Yatani Kanacho, ambaye ni Waziri wa Masuala ya Wafanyakazi na ya Kijamii,   pia atakuwa kaimu Waziri  wa Hazina ya Kitaifa na Mipango
(II)    Dkt. Julius Monzi Muia ameteuliwa kuwa Katibu katika Wizara ya Hazina ya Kitaifa.
(III)    Bw. Torome Saitoti ameteuliwa kuwa Katibu katika Idara ya Mipango.
(IV)    Meja Mstaafu Jenerali Gordon Kihalangwa ameteuliwa kuwa Katibu katika Wizara ya Ulinzi.

Taarifa na Gabriel Mwaganjoni.

Watumizi wa kivuko cha feri cha Likoni Kaunti ya Mombasa wametakiwa kuwa makini zaidi wakati huu ambapo bahari hindi inakabiliwa na mawimbi mazito ili kuepuka mikasa.

Nahodha mkuu wa shirika la huduma za feri nchini Ali Mohammed Nyaa amesema kwamba mawimbi na mvua zimesababisha utelezi hasa katika maeneo ya kuegesha feri akiwataka watumizi wa kivuko hicho  kuzingatia usalama.

Akizungumza katika kivuko hicho mapema hii leo, Mohammed amesema kwamba usimamizi wa shirika la huduma za feri unajizatiti kuimarisha huduma katika kivuko hicho.

Mohammed amesema kwamba usimamizi wa Kampuni hiyo unaendeleza ukaguzi na ukarabati wa mara kwa mara wa feri ili kuhakikisha ziko katika hali sawa ya kuendelea kuwahudumia Wananchi.

Kauli ya Mohammed inajiri baada ya ajali ya asubuhi ambapo lori la kampuni ya ‘Mombasa Maize Millers lililokuwa na zaidi ya bandali 350 za thamani ya zaidi ya shilingi milioni 1 kutumbukia baharini baada ya kufeli breki zake.

Taarifa na Sammy Kamande.

Mbunge wa kisauni Ali mbogo ameitaka serikali kumteua mwenyekiti wa tume ya kitaifa ya ardhi mara moja ili kuwawezesha viongozi kutatua mizozo ya ardhi inayoshuhudiwa katika maeneo mbali mbali ya nchini.

Kulingana na Mbogo ukosefu wa mwenyekiti wa tume hio umechangia changamoto zinazoshuhudiwa katika kutatua migogoro ya ardhi inayokumba wananchi.

Ameshikilia kwamba iwapo kutateuliwa mtu muafaka wa kushikilia wadhfa huo  mizozo ya ardhi itakomeshwa.