Monthly Archives: June 2019

Taarifa na Sammy Kamande.

Mombasa, Kenya, Juni 26 – Kwa mara nyengine tena idara ya usalama kaunti ya Mombasa imejitokeza na kuwasihi wakaazi wa kaunti hiyo kuwafichua walanguzi wa dawa za kulevya.

Kamishna kaunti hio Evans Achoki amesema endapo jamii itakuwa mstari wa mbele katika kufichua walanguzi,visa vya vijana kujiingiza kwenye utumizi wa dawa za kulevya vitapungua.

Achoki amedai kuwa waraibu wa mihadarati wamechangia ongezeko la visa vya utovu wa usalama katika maeneo mbali mbali kaunti ya Mombasa.

Taarifa na Mercy Tumaini.

Mombasa, Kenya, Juni 26 –  Mali ya thamani isiojulikana imeangamia baada ya bweni moja la shule ya upili ya wavulana ya St Georges eneo la Kaloleni kaunti ya Kilifi kuchomeka.

Akithibithisha   kisa hicho mkurugenzi wa elimu eneo la Kaloleni Khalif Hirey amesema kuwa   wanafunzi walikuwa madarasani wakati wa mkasa huo.

Kwa upande wake mwenyekiti wa bodi ya shule hiyo Mwamuye Bashir Omar amewataka wazazi waliona wanafunzi katika shule hio kutokua na hofu akisema wanafunzi wote wako salama.

Hata hivyo afisa mkuu wa polisi eneo la Kaloleni Kennedy Osando amesema uchunguzi umeanzishwa  kubaini chanzo cha moto huo.

Mbunge wa Mvita Abdulswamad Shariff Nassir.

Taarifa na Alphalet   Mwadime

Mombasa, Kenya, Juni 26 – Mbunge wa Mvita Abdulswamad Shariff Nassir amesema  takwimu zilizotolewa hivi majuzi na mamlaka ya kukabiliana na mihadarati na vileo  haramu nchini NACADA ni za kutisha.

Abdulswamad  amesema takwimu hizo zinazobainisha kwamba  asilimia 16.9  ya watoto wa shule ya msingi wamejitosa  katika uraibu wa dawa za kulevya inatia wasiwasi  na ni sharti hatua za haraka zichukuliwe ili kuidhibiti hali hiyo.

Kulingana na Abdhulswamad  ni lazima Serikali ijizatiti katika kuudhibiti ulanguzi wa dawa za kulevya humu nchini sawia na kutumia sheria zilizopo katika kuidhibiti hali hiyo tata.

Amesema japo kumekuwepo na haratakati za kukabiliana na utumizi wa dawa za kulevya miongoni mwa Wakaazi wa Ukanda wa Pwani, juhudi hizo hazijaungwa mkono ipasavyo na serikali.

Taarifa na Alphalet   Mwadime.

Shirika la kupambana na uraibu wa dawa za kulevya la Reachout Centre Trust limesema kuwa kaunti ya Mombasa ina takriban watu elfu 10 waliyoathirika na uraibu wa dawa za kulevya.

Mkurugenzi mkuu wa Shirika hilo Taib Abdulrahman amesema kwamba hali hiyo inastahili kuangaziwa, ikiwemo wadau kushirikiana na serikali kujitokeza katika kuikabili.

Akihutubu katika uwanja wa Makadara Mjini Mombasa wakati wa maadhimisho ya siku ya kupambana na ulanguzi wa mihadarati ulimwenguni, Taib amedokeza kwamba watoto wa hadi umri wa miaka 12 wamejitosa katika uraibu wa dawa za kulevya katika Kaunti hiyo.

Kulingana na Taib tayari harakati za kuikabili hali hiyo zinaendelezwa japo zinahitaji kuungwa mkono kikamilifu na Serikali.

Taarifa na Salim Mwakazi

Kwale, Kenya, Juni 26 – Mwakilishi wa Kike kaunti ya Kwale Zuleikha Hassan amewataka viongozi wa kisiasa kuangazia zaidi maswala ya maendeleo kwa wananchi badala ya kupiga siasa zisizokuwa na msingi wowote.

Zulekha amesema wakenya wanapitia shida nyingi mashinani kutokana na kutoangaziwa kwa kina maswala ya maendeleo, akiwataka viongozi hao kusitisha siasa na kuinua uchumi wa wananchi.

Akizungumza kule Diani kaunti ya Kwale, Bi Zulekha amesema iwapo viongozi wa kisiasa watambua magangaiko wanaopitia wananchi basi taifa hili litapiga hatua kimaendeleo.

Wakati uo huo ameunga mkono pendekezo la Waziri wa Fedha nchini Henry Rotich la kuwataka wahudumu wa bodaboda kuwa na bina, akisema hatua hiyo ni mwafaka japo akazitaka kampuni za bima kuhakikisha zinazingatia sheria ya fidia.

Mkurugenzi wa shirika la Reach Out Centre Trust, Taib Abdulrahman.

Taarifa na Mwahoka Mtsumi

Mombasa, Kenya, Juni 26 – Huku ulimwengu ukiadhimisha siku ya kimataifa ya kupambana na dawa za kulevya na ulanguzi haramu, wadau mbalimbali wamejitokeza na kuwarai vijana kutokubali kushawishi vibaya na kujitosa katika na jinamizi hilo.

Shirika la kupambana na utumizi wa dawa za kulevya Pwani la ‘Reachout Centre Trust’ kupitia Mkurugenzi wake mkuu Taib Abdulrahman, swala la utumizi wa mihadarati pwani limekithiri mno na linahitaj kukabiliwa.

Taib ameitaka serikali kuibuka na mikakati mwafaka itakayohakikisha walanguzi wakuu wa dawa za kulevya wanatiwa nguvuni na wala sio kuwahangaisha watu waraibu kwani wahaitaji tiba.

Kwa upande wake Shirika la kupambana na mihadarati na vileo haramu nchini NADACA, limeitaja jamii kujitokeza waziwazi na kuunga mkono vita dhidi ya dawa za kulevya nchini hasa katika ukanda wa Pwani.

Afisa wa miradi katika Shirika la Search for Common Ground, Mohamed Mwachausa.

Taarifa na Kibibi Mwinyihaji

 Mombasa, Kenya, Juni 26 – Kamati zinazoshughulika na maswala ya mahakamani kwa wakishirikiana na mashirika ya kutetea haki za kibinadamu, wameanzisha mchakato wa kujua jinsi watakavyofuatilia kesi za ugaidi na haki kupatikana.

Afisa wa miradi katika Shirika la Search for Common Ground, Mohamed Mwachausa, amesema lengo kuu la mchakato huo ni kuwaleta pamoja wadau hao na kutambua changamoto zinazokabili kesi za ugaidi nchini.

Kwa upande wake Kamishna wa kaunti ya Lamu Joseph Kanyiri, amesema visa vya itikadi hali na ugaidi vimepungua kiasi kutoka na ushirikiano wa wadau mbalimbali, japo akawasisitiza wazazi kuwapa muelekeo bora watoto wao.

Taarifa na Charo   Banda

Siku chache baada ya kanisa la Malindi Deliverance kubomolewa sasa bwenyenye mmoja amejitokeza na kudai kwamba ndie mmiliki halisi wa kipande hicho cha ardhi kilichojengwa kanisa hilo.

Akiongea na wanahabari bwenyenye huyo kwa jina Japhet  Noti Charo amesema kuwa usimamizi wa kanisa hilo uliomba  sehemu ya ardhi hio kufanya idaba zao  kwa muda tu kabla ya kujengwa kanisa hilo.

Noti aidha amesema kuwa ubomozi wa Kanisa hilo umetokana na agizo la mahakama la kuwataka waumini hao kuondoka katika eneo hilo akisema huenda usimamizi wa kanisa hilo ulikua na njama ya kunyakua kipande hicho cha ardhi cha ekari moja.

Hata hivyo Kasisi wa kanisa hilo Paul Mutunga  anadai kuwa haukupewa taarifa yoyote ya mahakama kuhusu ubomozi wa kanisa hilo huku viongozi mbali mbali wa kidini wakishtumu vikali hatua hiyo wakisema kuwa sehemu zote za kuabudu zinastahili kuheshimiwa.